Shillong, Nailar 01
Ban kyntiew ïa ki kam ïalehkai hapoh ka dong bad ka thaiñ, u MLA ka Mawkynrew Constituency u Bah Banteidor Lyngdoh ha kine khyndiat sngi u la hiar jurip ïa ki Indoor Hall bad madam phutbol kiba don hapoh ka constituency jong u.
U Bah Banteidor u la ong ba ka jingjurip ka jong u ïa kine ki jingtei ka long shi bynta ban pynbiang ïa ki samla ïalehkai jong ka thaiñ ba kin ïoh ban pynkhreh bha ïalade ha ki kam ïalehkai.
U la bynrap da kaba ong ba ka Jylla ka dang pynkhreh na ka bynta ka 39th National Games ka ban long ha u 2027 bad lyngba kine ki jaka kiba u la mang kan long ka jingmyntoi shibun ïa ki samla.
U la ïathuh ruh ba ha ka por ba u long kum u Myntri ka tnat ïalehkai u la mang kyrpang ba ki samla donsap jong ka constituency kin ïoh jingmyntoi. U la ïathuh ruh ba ïa ka Indoor Multi Purpose Hall ha ka shnong Laitkyrhong, u la mang kumba T. 2.21 klur bad ka jingtei ka la ïaid shaid shaid bad sa tang katto-katne ki bynta kiba dang sah ban pyndep.
Ha ka juh ka sngi u la hiar jurip ruh sa ïa kawei ka jingtei ïa ka madan phutbol ha ka shnong Laitkyrhong ka madan Jashir kaba u la mang T. 87 Lak tyngka.
Shuh shuh na la liang u Bah Banteidor u la ïathuh ba ka jingtei mynta ka la ïaid shaid shaid ban pyndep kloi khnang ba ki khynnah kin ïoh ban pynkhreh bha na ka bynta ka National Games.
U la ong ruh ba ka jingtei ïa ka Indoor Multi Purpose Hall u don ka jingkyrmen ba kin lah ban pyndep ha u Risaw mynta u snem.
Ha kane ka jingleit jurip la synran lang ïa u MLA da ki Rangbah Shnong, ki dkhot ka Executive Committee jong ki shnong, ki paidbah nongshong shnong bad kiwei.
