Shillong Nailar 01
U wei u Rangbah briew ïa u ba la tip kyrteng u Bah John Bosco Shadap ba 35 snem karta la suba ba u la pynkut ïalade ha u tyllai phasi ha ïingwai kaba don ha Mawblei.
U Bah John Bosco Shadap u sah tang marwei ha katei ka ïing, bad u dei trai shnong na Mawkyndeng West Jaintia Hills District bad u ba shu shongwai ha Mawblei. U la don ruh ki khun arngut, katba ka lok bad ki khun pat ki sah beit sha Sohra bad ma u pat, u sah marwei ha Mawblei ban bylla.
Katkum ka jinglap ïa kamet jong u Bah John mynta ka janmiet jong ka 01 Tarik u Nailar 2025, u la sdien ïalade da ka Towel ha kamra Buh-um bad la don lang ruh kawei ka borti balieh ha ryngkat ka jinglyngkien jong ka snam.
La suba ruh ba u Bah John u la dep ban sdien phasi la kumba katto kattne sngi ei-ei namar ka met jong u ruh ka la pyut bad sma iewduh.
Hadien kata la wan poi noh ki bor pulit ban shimti ïa katei kamet.
Ha ba ïakren bad ka hynmen trai jong u Bah John Bosco ka Kong Banrikynti Shadap ka la ïathuh ba ki la lap ïa kamet ïap jong u, kadei hynne ka janmiet ha kapor 3 baje eiei.
Ka Kong Banrikynti ka la ïathuh ba hadien ba ka trai ïing jong u, ka la phone ïa ki ban pyntip, ba u Bah John u khlem plie shuh ïa ka ïing bad khangdam la kumba katto kattne sngi bad hadien ba ki la leit ban peit la lap pynban ba u la sdien phasi ïalade hapoh ïing.
Haba kylli pat ka la ïathuh “U Bah John Bosco u la don ka jingleh sngewsih hashwa ba un leh ïa kane ka kam. Bad haba ki kylli ïa u ba kaei kadaw ba u leh sngewsih? u Bah John um shem la ïathuh eiei.”
Shuh shuh ka la ong ruh, ba ki bahaïing hasem kim shem la don kano kano ka jingsuba sniew eiei halor ka jingïap jong u, namar ki tip ba dei ba u la pynïap hi ïalade namar ïa ka ïing ruh u la khangdam. Kumta ki bahaïing hasem kim shem kwah ban phah leh ïa ka post mortem ïa kamet u Bah John Bosco Shadap.
