Shillong Nailar 01
Ka Executive Committee jong ka Khasi Hills Autonomous District Council (KHADC) hapoh ka jingïalam u Chief Executive Member u Bah Shemborlang Rynjah, ki Executive Member bad ka jingdonlang u Chairman, Bah Strong Pillar Kharjana ha ka 01 tarik u Nailar 2025 ki la hiar sha ïewduh ban ïa kynduh ïa ki paidbah nongshong ïew kiba die jingdie khamtam haba ïa dei bad kito kiba wan die jur ha ïewdie lang.
Ha kane ka sngi na ka liang ki nongshong ïew ki la pynsngew sha u CEM bad ki dkhot jong ka EC ïa ki jingeh kiba ki ïa kynduh, kumjuh ruh ki nongrep kiba wan die ïa ki mar-rep jong ki, ba kumno ki mat jingeh na ka jingshah ot kilo ha ki mahajon ha kaba ki ot shi kilo na ka shiphew kilo.
Ki la batai ruh ba ka jingot kilo ka dei na ka daw ba ki don ki mar kiba pyut ki ba hap ban bret na kata kadaw ki ot ïa ka kilo. Ki la ïathuh ba kane ka dei kaba ki la leh naduh mynshwa bad ki dang bud ïa ka haduh kine ki sngi.
Ha ka jingïakren bad ki lad pathai khubor na ka liang u EM u Bah Powel Sohkhlet u la ïathuh ba ha ka jingleit jurip ki la ïoh ban ïa kren bad ki nongrep bad la lap ba ki nongdie sohsaw bad kubi ka don ka jingot kilo, ha kaba ka don ka jingïasngewthuh jingmut hapdeng ki nongrep bad ki nongthied.
U la ong ruh ba u sohsaw bad u kubi ki dei ki mar-rep kiba pyut kloi haba ki nongrep ki wan rah, ki kit ïew shuwa ïa ka kriah ki sa ot kilo.
U Bah Powel Sohkhlet u la ong ba ïa u sohsaw bad u kubi ki peit kat kum ka mar bad ki sa ot ïa ka kilo, haba ïa dei bad u kajor ki ot kilo shuwa ïa ka kriah bad ki sa ot pat sa ïa u jhur, kaba ki nongthied ki ïathuh haba ki thied na u nongrep 50 kilo na ka liang jong ki pat ki die kutia shi kilo ar kilo bad ha man ba ki die kam lah ban long ba kan shu biang beit thik kan don ka jingtam. Hynrei ki don ruh kiba shim kabu wat lada u mar u bha ne u sniew ruh.
“Kam lah ban pynduh ïa ka jingot kilo bad na ka liang ka EC kan sha shong pyrkhat bad kam dei ban shu leh kyrkieh ïa kane ka kam. Ka EC ka lap ba ha ka por bym don phan khasi, haba ki thied ïa u phan dkhar ki hap ban thied beit 50 kilo ïa kane ka EC kan sa shong pyrkhat bad ban wat ïa kane ruh” la bynrap u Bah Powel Sohkhlet.
Na ka liang u CEM pat u la ong ba ka jingwan jong ki ha kane ka step ka long ban sngap ïa ka jingeh kaba ki nongrep ki mat bad ban sngap ïa kaei kaba ki nongrep ki pynpaw.
Shuh shuh u la ong ba ha kine ki khyndiat sngi ka Council kan sa khot ïa ka jingïalang ïa ki seng nongrep ban ïa kren halor kane bad ban sngewthuh shuh shuh ha shuwa ban ïaid sha khmat.
