Shillong, Nailar 01
Ka Sorkar Meghalaya sa shisien pata kala pynlong biang ïa ka tamasa Sohtrun ha ka sien kaba lai ïa kaba la tip kum ka “Meghalaya Pineapple Festival, 2025” kaba la pynlong da ka Sorkar Jylla Meghalaya ha Dilli Haat Nongbah Delhi ïa kaba la sdang naduh ka 1 Tarik Nailar, 2025 bad ka ban sa kut ha ka 3 Tarik Nailar, 2025.
Ka jingpynkhreh ïa kane ka tamasa ka long kaba janai bha bad kaba ishongkun haduh katta-katta namar ki nongdie ïa ki sohtrun bad ïa kiwei-kiwei ki jait tiar ki la wanrah ïa ki tiar bad ki mar jong ki na Meghalaya ban pyninam bad die ha Nongbah Delhi.
Ha kane ka tamasa ka ban sa long 3 sngi lynter, u Myntri Rangbah ka Jylla, u Conrad K. Sangma ula wan ban plie paidbah ïa kane ka tamasa.
Ka jingthmu ka Sorkar Jylla ban pynlong ïa kane ka tamasa Sohtrun, ka long khnang ban kyntiew ïa une u jait soh bad ba ki briew na kylleng ki Jylla bad Ri ka pyrthei, kin ïoh mad ïa ka jingbang bad jingthiang u Sohtrun na ka Meghalaya.
Ha kane ka tamasa, la don bynta rug da u Myntri ka Tnad ka rep ka riang jong ka Sorkar Pdeng, u Shivraj Singh Chouhan nalor u Myntri Rangbah ka Jylla, u Conrad K. Sangma bad ki heh ophisar ka Sorkar Pdeng bad ka Sorkar Jylla.
Ïa kane ka tamasa la sdang da ka jingïasam ïa ki jingiateh kular (MoU) bapher bapher halor u sohtrun. Hadien kane, u Myntri ka Sorkar Pdeng u la pyllait ïa ka kot lyngkdop halor ka ‘Jingkiew jong ka Jylla Meghalaya ha ka liang ka rep ka riang’.
U Myntri ka Rnad rep ka Sorkar Pdeng, u Shivraj Singh haba kren ha kane ka sngi u la ong ba u sohtrun na ka jylla Meghalaya u long uba pher ha ka jingsma bad ka jingbha.
U la ïaroh ïa ki nongrep bad ki paidbah ka jylla Meghalaya kiba trei shitom ban pynmih ïa ki mar rep kiba kynthup ia ki soh, ki musli musla, u shynrai, u sying, u kophi, u slasha, u soh phan bad u tit jong ka jylla kiba long kiba bha. Kiba bun na ki ki dei ki khlem khleh dawai bad ki donkam ban pynphriang kyrkieh ha kylleng ka pyrthei.
U Myntri ka Sorkar Pdeng u la ong ba ka Sorkar Pdeng kan ïatreilang bad u Myntri Rangbah ka jylla bad ki heh ophisar ka jylla na ka bynta ban shalan ia ki mar na ka thain shatei lammihngi shabar jong ka jylla bad shabar ka jylla.
U Chauhan u la ong shuh shuh ba u Myntri Rangbahduh ka ri, u Narendra Modi u angnud ban kyntiew ia ka thain shatei lammihngi.
“Ka sorkar pdeng kan ai ka jingkyrshan kaba pura ia ka jylla Meghalaya na ka bynta ki kam pynroi kynthup ia ka rep ka riang”, ong u Myntri.
U myntri ka tnad rep ka sorkar pdeng u la pyntip ba shen un sa wan biang sha Meghalaya ryngkat bad ka kynhun ki stad saiantis. U la ïathuh ruh ba haba u la wan jngoh ïa ka jylla ha ka ‘Vikasit Krishi Sankalp Abhiyan’, ki nongrep ki la pynpaw ïa ki katto katne ki jingeh bad ki jingeh kiba ïadei bad ka rep ka riang.
“Ki nongrep ki la dawa ia ki lad ki lynti kiba biang na ka bynta ban pynjlan ia ka ‘jingim jong ki mar rep’. Ha kaba iadei bad kane, la ai ki jingbthah kiba donkam ia ki riewstad jong ka Indian Council of Agricultural Research bad ki lad ki lynti kiba skhem kin sa mih shen bad ki jingwad bniah ki dang iaid shakhmat”, bynrap u Myntri.
U myntri sorkar pdeng u la ong ba ka jingpynkhreh ia ki mar rep ka long kaba donkam bad la pyrshang tyngeh ban seng ia ki jaka pynkhreh kiba iadei. Ka sorkar jylla ka la rah ruh ia ka jingtyrwa ‘air lifting’ ia ki mar rep bad la shim ia ka da ka jingsngewrit.
“Yn trei ruh ia ka lad ban kit ia kine ki mar lyngba ka rel. Yn pyrshang ruh ban pynbun ia ka jingpynmih ia u sohtrun ha ka shi hectare. Yn pynkhreh ia ka requisite roadmap na ka bynta ban kyntiew ia ka rep ka riang ha ka jylla Meghalaya ha ryngkat ka jingiatreilang bad ka sorkar jylla”, ong u Myntri.
Haba pynkut ia ka jingkren jong u, u myntri ka tnad rep ka sorkar pdeng u la khot ia ki samla ban seng ia ki kam ha ka rep ka riang. U la kyrpad ruh ïa ki trai ri ba kin pyndonkam hok ïa ki mar rep jong ka Meghalaya.
“Ki mar jong ngi ki long kiba bha tam ha ka pyrthei, ngim dei ban artatien ban pyndonkam ïa ki,” ong u Myntri.
