Shillong, Nailar 01
Da kaba shim ïa ka South West Garo Hills ryngkat bad ka jylla baroh kawei ha kaba ïadei bad ka jingkyntiew ïa ka jingïalehkai phutbol, ka Meghalaya Football Association ka la ai khusnam ïa ka Ampati District Football Association da ka jingpynïasoh shipor.
Ïa kane ka syrnod ba shipor, la aiti sha ka ADFA da u President ka MFA u Bah Hamletson Dohling ha ka sngi Thohdieng ha ka jingïalang kaba la long ha Ampati Circuit House.
Ka jingïasoh bad ka MFA kan plie lad shuh shuh ïa ki nongïalehkai bad ki klob na South West Garo Hills ban ïashim bynta pura ha ki lympung ïalehkai phutbol ban pynlong da ka MFA.
Ha kane ka sngi la ïadon lang u General Secretary ka MFA u Bah Sunesh Syiem, kumjuh u Vice-Presidents u Dr Lumbor Mawsor bad u Salja Marak lem bad u Bah YG Lyngdoh uba long u dkhot ka MFA. Na ka ADFA la mihkhmat da u Chairman u Clement G Momin, ryngkat u Secretary u R Sangma bad kiwei.
Na ka liang ka MFA ka la kitbok kitrwiang ïa ka ADFA bad ki nongkitkam jong ka ba kin nanglah ban trei shitom ha ka ban kyntiew ïa ka jingïalehkai phutbol ha South West Garo Hills.
