Brasilia, Nailar:
Ka Brazil ha ka Sngi Palei ka la byrngem ba kan ïakhun pyrshah ia ki khajna ba la wanrah da u President ka US- u Donald Trump halor ki mar khaïi jong ka Brazil bad kumta ruh ka la ong ba kan pynphai kylliang ia ka US da kiwei pat ki rukom.
U Myntri ka tnat pla tyngka jong ka Brazil, u Fernando Haddad, u la ong ba ki khajna ba la pynthymmai ha ka Sngi Balang, ki long kiba kham biang ban ïa kaba la khmih lynti, ha kaba ki don katto katne ki mar ba kongsan ba shalan shabar ri, kiba la pyllait na ka jingbuh khajna.
Watla katta ruh, ka don ka jingbymhok ha ki lad ki lynti ba la pynbna ha katei ka sngi bad u ong ba ka long kaba donkam ban ia pynbeit bad pyrkhat bha sa shisien.
Da kaba kdew ïa ka jingshah kynnoh be-aiñ pyrshah ïa u paralok jong u, uba don ha ka liang ka diang, u Jair Bolsonaro, uba long u President barim jong ka Brazil uba dang shah bishar halor ka jingkynnoh ba u la thmu ban pynkhih bor ïa ka bor synshar, u Trump ha ka sngi thohdieng u la soi ïa ka hukum treikam kaba la rah biang ïa ka khajna shaduh ka 40% ia ki mar khaïi jong ka Brazil, kaba la kyntiew ïa ka khajna khaïi- pateng jong ka Brazil baroh sha ka 50%.
U Alckmin, u ong ba katei ka khajna thymmai, kan treikam kumba 36% jong ki mar ba shalan da ka Brazil sha America, kaba iaryngkat bad kumba $14.5 billion ha u snem ba la dep.
