Kam dei namar ka pisa; ka dei beit thik halor ka roi ka par, ong u Bah Tynsong

"Nga kwah ban ai jingmut ïa ka Congress ba kan sngewbha ban khmih bniah biang bad ban leh ïa ka jingmaramot kaba paka," u la ong.

Shillong, Nailar, 01

U State-President ka National People’s Party (NPP) uba dei ruh u Symbud Myntri Rangbah ka Jylla, Bah Prestone Tynsong u la kyntait ïa ki jingkynnoh ba ka seng jong u ka don bynta ha ka ban knieh jyndat ïa ki MLA na kiwei pat ki seng, hadien ka jingpynïasoh ba dang shen jong u MLA Congress, Bah Ronnie V. Lyngdoh sha ka NPP.

Haba kren sha ki lad pathai khubor ha ka Sngi Thohdieng, u Bah Tynsong u la ong ba ka rai jong ki MLA ban pynïasoh sha ka NPP ka dei namar ki ‘agenda’ kam pynroi jong ka seng, bad ym ka jingtyrwa pisa.

“Kam dei namar ka pisa; ka dei beit thik tang halor ka roi ka par,” u la ong da kaba bynrap ba ki MLA ki la ïohi ïa ka jingkut jingmut jong ka seng ha ka liang ka roi ka par bad ki la shah pynbor ha ki paidbah ka konstitwensi jong ki ban ïasoh noh sha ka NPP.

U la bynrap shuh-shuh da kaba ong, “Ym dei u Bah Ronnie V. Lyngdoh uba la jied ban pynïasoh sha ka NPP, dei ki briew jong u, kaba mut – ka rai jong ki paidbah ha kaba kut. Lada ki briew jong ki kim kwah ïa u MLA jong ki ban pynïasoh sha ka NPP, balei kin leh ïa kata? Peit, lai ngut ki MLA na ka Congress bad nangta sa shisien, dang shen sa uwei pat u MLA na ka Congress u la pynïasoh sha ka NPP. Hato phi tharai ba kine ki 4 ngut ki MLA ka Congress, kiba la pynïasoh sha ka NPP kin ym ïasyllok bad la ki nongïalam bad ki briew jong ki na la ki jong ki konstitwensi. Ki hap ban leh ïa kata bad da kaba leh kumta, ka pynshisha da kaba shai ba ki paidbah ka Jylla mynta ki la jied ïa ka NPP, ki la kwah ban pynïasoh sha ka NPP bad ka dei namar kawei ka mat – bad kata ka dei ka roi ka par.”

U Bah Tynsong u la kdew biang ïa ka polisi plie jingkhang jong ka seng kaba pdiang sngewbha ïa ki nongmihkhmat ba shah jied na kiwei pat ki seng ban pynïasoh sha ka NPP.

“Ngi don ka kamra kaba heh, bad ka jingkhang ka dang plie. Lada baroh 60 ngut ki MLA ki pynïasoh bad ngi, katta nang bun katta nang kmen,” la ong u Bah Tynsong da kaba pynpaw ïa ka jingangnud ban ïohi ba baroh 60 ngut ki MLA ha ka Jylla kin long ki dkhot jong ka NPP.

“Kum u President ka NPP, ngi pdiang sngewbha ïa baroh. Lada ngi ïoh 60 tylli ki nombar, ngin sngewkmen shibun. Sngewbha ïasoh bad ka NPP. Haba phi pynïasoh, phi dei ban sngewthuh kawei ba phi donkam ïa ka roi ka par. Ngi don hangne ban ai ïa ka roi ka par sha man la ki bynta jong ka Jylla. Ngi don hangne ruh ban pdiang sngewbha ïa ki nongmihkhmat ba shah jied lada ki kwah ban ïasoh bad ka NPP, mynta ka sngi ne lashai ne 6 bnai, ne shi snem shuwa ban kut ka samoi treikam,” u la pynpaw.

U Bah Tynsong u la ai jingmut ruh ïa ka Congress ban khmih bniah biang bad pynthymmai ïa ki kam saiñ pyrthei hapoh jong ka, da kaba ai jingmut ba ka jingbym lah jong ka seng ban bat ïa la ki MLA ka dei namar ka jingduna jong lajong hi.

“Nga kwah ban ai jingmut ïa ka Congress ba kan sngewbha ban khmih bniah biang bad ban leh ïa ka jingmaramot kaba paka,” u la ong.

Utei u nongïalam ka NPP u la pynpaw biang ïa ka jingangnud jong ka seng ban pynbiang ïa ka roi ka par sha man la ki bynta jong ka Jylla, da kaba pdiang sngewbha ruh ïa ki nongmihkhmat ba shah jied na kiwei pat ki seng ban ïasoh sha ka NPP.

“Ngim don hangne ban pynpra ïano-ïano. Balei ngin pynpra? Kam dei ka jingkylli ban pynpra. Ngim don hangne ban pynpra ïa ka VPP, ban pynpra ïa ka HSPDP ne ban pynpra ïa kino-kino kiwei pat ki seng saiñ pyrthei kum ka UDP bad kiwei. Ngim don hangne na bynta kata. Ngi don hangne kumba nga la ong – ngi don ïa ki miet kiba khlem thiah bad ngi kham duna hi ruh ban thiah naba ngi kwah ban pynbiang ïa ka roi ka par sha man la ki konstitwensi hapoh ka Jylla,” la bynrap shuh-shuh u Bah Tynsong.