Khliehriat, Nailar 01
Ka Narwan SC bad ka Suchen Lumïarain SC ki la jam sha ka semi-final jong ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka Narwan SC bad Suchen Lumiarain SC ki la khur jingjop ha ka jingïalehkai quarter final kaba la long ha ka sngi Thohdieng ha madan artificial turf Diengshynrum, Khliehriat.
Ha ka quarter final kaba nyngkong, ka Narwan SC ka la jop da 1-0 kol ïa ka Umrasiang United SC, bad ïa kane la thep da u Deibormi Sumer ha ka minit kaba 71.
Haba phai sha ka jingïalehkai kaba bud, ka Suchen Lumiarain ka la pynliem noh ïa ka Youngster SSC Huroi lyngba ka tie-breaker da 3-2 kol hadien ba kim shym la lah ban pynkhih jar.
Lyngba kine ki nam jop, ka Narwan SC bad ka Lumïarain SC ki la kiew kyrdan sha ka Second Division na ka bynta ka samoi ka ban wan.
