Kum ka jaidbynriew ngi ju sngew sarong bad khyllew ban pynpaw sha ka pyrthei ba ngi long ki briew kiba tip briew tip blei bad ruh kiba leh khuid leh suba ym tang ha la ki ïing ki sem hynrei wat shabar ruh kumjuh. Ka Meghalaya jong ngi, ka la ïoh ruh ka nam ha kylleng ka pyrthei ban don ïa ka shnong kaba khuid tam ha dewbah Asia, kata lyngba ka shnong Mawlynnong. Ngi ïohi ba ki nongshong shnong ka Mawlynnong, ki long shisha kiba leh khuid ym tang hapoh ka ïing ka jong ki, hynrei wat shabar bad kumjuh ruh ha ki surok syngkieñ bad ym tang ba ki kiar na kaba bret pathar hynrei wat ban hikai ïa ki briew ba wan nabar ban shim lang ka bynta jong ka jingleh khuid. Kane ka jinglong ban wanrah ïa ka khuid ka suba la shem ba nalor ka shnong Mawlynnong, ki don sa katto-katne tylli ki shnong kiba la pyrshang lang.
Hynrei haba ngi phai pat sha ki bynta jong ka sor Shillong bad ki shnong markhap bad ka sor, ngi lap bad shem ba kata ka pyrkhat-pyrdaiñ ban wanrah ïa ka khuid ka suba ka la nang hiar katba nang ïaid ki por. Ka jingleh khuid hi kumba long mynta, imat ka long beit thik tang shisien ha ka shisnem, kata ruh haba kum ki dorbar shnong ki pynlong ïa ka jingpynkhuid shnong. Lait nangta, ym don satia kiba pyrkhat ïa kata ka bynta hynrei muja beit ban bret pathar ïa ki jaboh jabaiñ kat shaba lap ba shem bad kat haba shong kai pyngngad. Balei haduh katne-katne? Hato bym dei ha ïing lajong imat, ka don beit ka jingsngew ba mat dep shato, ki la don ki ban sa wan khar bad pynkhuid, ym tip pat ba kane ka pyni sha kiwei pat ïa ka akor ka burom bad ka jinglong jong ki briew jong ngi.
Haba ngi ïaid ha ki lynti syngkieñ ha kylleng ki bynta jong ka sor Shillong ne khapsor, ngin lap beit ïa ka jingbret pathar ha ki rud surok ne sha ki nala ïa ki jaboh jabaiñ, khamtam ki song chip, ki bitor kyiad, ki bitor um, ki synduk thep sikret, ki pla plastik bad bun kiwei-kiwei. Kane ka long thik kumba thad ïa ka akor ka burom bad ka jinglong jong ngi hakhmat ka pyrthei. Ym dei tang ha ki jaka kyndong ne jaka kynjah, hynrei kum kine ki jingleh bad bret pathar yn lap ruh wat ha ki jaka ïaid briew khamtam ki khyllung khynnah. Teng-teng haba peit ïa ka jingbret pathar, ka la pynpoh dor shi kat dei eh ïa ka jinglong ki briew. Baroh ki briew ki sngewtynnad ban ïa shong kai shiparalok, bad la ju lap haba ïaid lynti ha ki por mynmiet, ïa ka jingïashongkai jong ki briew hapoh ki kali. Ynda la dep ban shong kai bad pynlut ïa ki jingbam-jingdih, ki dei ban lum ban lang noh ïa ki tum ki tam bad thep bha ban leit bret ha ki jaka ba biang ne rah sha ïing ban ai pat mynstep ha ki kali kiba ju wan lum ñiut. Hynrei kat kumba paw, imat ka don beit ka jingsngew ha kito ki briew ban ong bret beit, sa leh aïu, kam dei te me ha ïing lajong.
Kum ki bor pynïaid shnong, ki seng samla bad ki seng bapher-bapher ki dei ban shimkhia lem ïa kane ka bynta ban ai lang ka jingïatreilang. Lyngba ka jingïatreilang yn lah pat ban khanglad ïa kum kine ki briew bad ban wanrah ïa ka jingkhuid jingsuba. Kumba long mynta, la ijli shisha ban peit ïa ki rud surok ne ki nala ha kylleng ki bynta, kaba la dap sa tang da ki jaboh jabaiñ. Kan myntoi aïu kata ka jingleh khuid tang hapoh ïing, lada shabar ngim lah ban bteng. Ngi ju sngewtynnad ban ïalap khana shaphang ka jingkhuid jingsuba jong kiwei pat ki ri ka pyrthei hynrei ngi kum klet noh pat ïa ka jong lajong.
