Shillong, Nailar 01
U Working President ka United Democratic Party (UDP), Bah Paul Lyngdoh uba dei ruh u Myntri ha ka Sorkar Meghalaya Democratic Alliance-2 u la pynpaw ba haduh mynta, ka seng UDP kam pat ïakren eiei ïa ka kam bujli Myntri ha ka Sorkar MDA-2.
Haba kylli la ka don ne em ka jingdawa na ki nongkitkam ka UDP West Jaiñtia Hills District ban pynhiar shuki Myntri noh ïa u Bah Kyrmen Shylla, MLA na Khliehriat konstitwensi, u Bah Paul Lyngdoh u la ong ba haduh mynta kam pat don kum kata ban dawa ban pynhiar shuki.
Kumban shu pynkynmaw ha kine ki sngi ba u Myntri Rangbah ka Jylla, u Conrad Sangma un bujli Myntri ha Sorkar Jylla ha kine ki sngi ban wan.
La ïoh jingtip ba ka NPP, BJP bad HSPDP ki lah ban bujli Myntri hynrei tang ha seng UDP kam don ka jingthmu ban kylliang Myntri.
Shuh shuh ban shu pynkynmaw ha kine ki sngi ki nongkyrshan ka UDP West Jaiñtia Hills District ki la pynpaw ba ki kwah ba ka UDP Sengkmie kin weng ïa u Bah Kyrmen Shylla na ka kam Myntri bad pynrung bujli ïa u Bah Lahkmen Rymbui MLA na Amlarem ne ïa u Bah Nujorki Sungoh, MLA na Mowkaïaw konstitwensi.
