Shillong, Nailar 01
U Myntri Rangbah ka Jylla Meghalaya, u Conrad Sangma, ula phah da ka shithi sha u Myntri Rangbah ka Jylla Chhattisgarh, u Vishnu Deo Sai, ha kaba u la pynpaw ïa ka jingsngewkhia halor ka jingkem jong ki pulit ka Chhattisgarh ïa ki arngut ki Sister ka Balang Katholik kiba dei jong ka Assisi Sisters of Mary Immaculate na Kerala kiba la shah phareb bad shah kem khlem nongrim ha Durg Railway Station ha Chhattisgarh da ki dkhot ka Bajrang Dal.
Kine ki arngut ki Sister ki dei ïa kiba la tip kyrteng kum Sister Vandana Francis bad Sister Preethy Mary kiba trei ha Fatima Hospital ha Agra.
Ka jingshah kem kitei ki arngut ki Sister ka dei halor ka jingkynnoh lamler ba ki don ban pynkylla ñiam jubor bad ka jingkhaïi briew.
Ha ka shithi jong u, u Myntri Rangbah ka Jylla u la maham ba ka jingshah lehbeiñ ha ka ñiam kam don jaka ha ka ri India kaba synshar paidbah bad kaba khlem ñiam, da kaba ong ba kum kine ki jingkynnoh ki buh jingma ïa ki jingim bad ka wanrah ïa ka jingkhuslai kaba buh jingma ïa ki jaitbynriew rit paid.
“Ka hok ka dei ban jop. Ka jingbym lah shah kam dei ban shah,” u la thoh, da kaba pynbor ruh ban ïada ïa ki hok jong ki rit paid.
Kitei ki Sister ha rngkat bad u Sukhman Mandavi ki la shah kem ha ki Pulit Rel Sorkar ha steshon rel Durg ha ka 25 tarik Naitung hadien ka jingujor jong uwei u nongtrei jong ka seng Bajrang Dal na katei ka jaka.
Kitei ki arngut, ki la shah pynngat ha ka kyndon kaba 4 jong ka Chhattisgarh Freedom of Religion Act, 1968, halor ka jingkynnoh ba ki la pynbor ban pynkylla niam, bad ha ka kyndon kaba 143 jong ka Bharatiya Nyaya Sanhita (BNS), halor ka jingkhaii briew.
Ka Catholic Bishops’ Conference of India, ka la pan jingïarap na u Myntri Rangbahduh ka Ri, u Narendra Modi bad u Myntri kam pohïing jong ka Sorkar Pdeng, u Amit Shah, bad ki Khristan Katholik ha Meghalaya, ki la ai ia ki dorkhas ban dawa ia ka hok. Ki jingïakhih ha kylleng ka ri halor ki jingshah kem ki dang iai bteng.
Kawei na ki lai ngut ki khynnah kynthei kaba la ïathuh ba ka la “pyllait im” ha katei ka mukotduma, mynta ka la kam ba ka leit ryngkat bad ki nun da ka mon sngewbha sha Agra ban trei kum ka nongshet jingshet, bad ka la kynnoh ba ki dkhot jong ka Bajrang Dal, ki la thombor ia ka.
