Puk tur kynsan ki nongdie madan sha ophis ka SMB bym ïoh ïa ka COV

La sakhi ruh ba da ki spah ngut ki nongdie madan ki la leit tur sha ophis ka Shillong Municipal Board (SMB) ryngkat bad rah ruh ïa ki plakad.

Shillong Nailar 01

Ha ka step jong ka sngi Thohdieng ki nongdie madan kiba hap hapoh ka shatri jong ka Meghalaya Greater Shillong Progre-ssive Hawkers Association (MGSPHA) ki la leit tur kynsan kynsan sha ka Ophis treikam ka Shillong Municipal Board (SMB) ban pynpaw ka jingpyrshah ïa ka jingslem ban ai ïa ki Certificate of Vending (COV).

Kane ka jingleit tur ki nongdie madan mynta ka step kadei ruh ban pynpaw ka jingbym hun ïa ki jaka ba la ai shaki nongdie madan kiba la ïoh ha jaka ïeng kali ha MUDA. 

La sakhi ruh ba da ki spah ngut ki nongdie madan ki la leit tur sha ophis ka Shillong Municipal Board (SMB) ryngkat bad rah ruh ïa ki plakad.

Ki nongtrei ka Shillong Municipal Board (SMB) mar shu wan tur kynsan ki nongdie madan ki la khangnoh ïa ka gate bad ym shah ban rung shapoh, ha kaba ka la mih ruh ka jingïania hapdeng kiba shongdie madan bad ki ophisar ka SMB.

Haba kren sha ki lad pathai khubor ka Kong Angela Rngad ka nongaibuit ka seng ki nongdie madan ka la ong, ba ki bym pat don ïa ka COV mynta ki la duh ka kamai da ki taïew bad mano ban bah-khlieh. Ki don haduh 60 ngut tam kiba shongdie madan ki bym pat ïoh ïa ka COV.

Ka la ong “Ka jingdawa ba hakhmat kalong ba ka Provision Town Vending Committee (PTVC) kadei ban shong mar-mar mynta ban ïakren halor ka jingbym pat ïoh kiba shongdie madan ïa ka Certificate Of Vending (COV) kiba dei hok ban ïoh.”

Shuh shuh ka la ong, ka jaka ba la ai bad pynshna ka sorkar ha jaka ïeng kali ha MUDA kidei ban leit peit biang sa shisien, namar kam pat long kaba biang ban shongdie jingdie bad  ki jaka ruh ki long kiba rit haduh katta katta. Da kaba byrngem ruh ba lada kim khot ïa ka PTVC mynta ne lashai ban ïakren halor katei ka mat jingdawa, baroh ki nongdie madan kin nym kynriah na kane ka jaka bad ka jingïakhih kan nang kham tyngeh.

Hadien kumba katto kattne kynta eiei ba ki nongdie madan ki la shong kyllaiñ mungor hapdeng surok ban pyrta “Ngi dawa ïa ka hok”, na ka liang ka PTVC ka la khot ïa ki nongïalam ba shongdie madan ban ïakren ha ka 06 tarik u Nailar 2025.