Shillong Nailar 01
Ka Bajaj Finance Limited mynta sngi thohdieng ka 01 tarik u Nailar 2025 ka la sdang ïa ka Financial Literacy ne ka jinghikai pynsngewthuh ha ka liang ka pisa tyngka kaba la ai kyrteng “Arthsutra Samvad” ha Shillong.
Ka jingsdang ka Bajaj Finance Limited ïa kane ka jinghikai ka long kum shibynta ka jingpynlong ïa ka jingpynshai ha baroh kawei ka ri ban kyntiew ïa ka jingpynsngewthuh halor ka pisa tyngka.
Ha kane ka sngi la don lang ki tnad treikam bapher bapher, ba kynthup ïa u Dr.Utpal Kumar De, u ba dei u nonghikai ha ka subjek Economics ha NEHU, u Pankaj Kumar Rasgania, IPS u ba dei u SP, Cyber Meghalaya bad kiwei kiba mihkhmat na ka Meghalaya Rural Bank Livelihodds Society EKH.
Haba ai jingkren ha kane ka jingïalang u Dr.Utpal Kumar u la ban jur da kaba ong ba ka jingtip ïa ka kam pisa tyngka ka wan da ka jingsdang ban pule bad thoh ba kynthup ban don ïa ka bor sngewthuh bad ka rukom pynïadei.
U la ong ba ka jingtip ïa ka kam pisa tyngka kam mut tang ban nang ban kheiñ pisa, namar wat ki longshuwa jong ngi ki nang ban kheiñ, kaei kaba donkam ka long kumno ngi pynïaid, ngi pynlut, bad pynroi ïa ka pisa da ka jingstad.
“Bun ki briew ha ka jylla ki kamai lyngba ka kam-rep bad ka kam tih marpoh khyndew bad ki ju kynshew ïa ka pisa ha ïing. Lada la kynshew ïa ka pisa khlem da don ka jingpynlut ka dor jong ka, ka hiar man ka por. Kumta ki briew kidei ban tip kumno ban mang bad kumno ban pynlut ban lah ban pyndap ha ka lawei jong ki” u la bynrap
Na ka liang u Pankaj Kumar, IPS pat haba kren ha kane ka sngi u la batai halor ka jingdonkam ban buh shibun ka pisa da kaba ong, ba ki bank ki lah ban peit bniah ïa ka jingdon jong u briew hashwa ban ai ram ïa ki
U la kren ruh halor ka jingmih ki kam thok da kaba kyrpad ïa ki paidbah ba kin long kiba husiar bha haba ki pyndonkam ban siew pisa online da kaba ong ba ka UPI kadei ka shlem pynïaid pisa kaba biang tam ha ka pyrthei kaba pynsuk ha ka rukom siew ne phah pisa, hynrei wat la katta ruh u la maham ba dei ban peit bha, namar da bakla ïoh duh ïa ka pisa da kaba kum siew bakla.
