Mairang, Nailar 01
Ka jingpeitngor ïa ka rung ka mih jong ki bar Jylla ha kylleng ki jaka jong ki thaiñ West Khasi Hills da ki kynhun bapher-bapher ka la ïai bteng hadien ki jingjia jong ka jingkyndang ka Sorkar Assam ïa ki briew kiba nabar kiba shong be-aiñ hapoh ka Assam.
Halor kane ka bynta , ha Eastern West Khasi Hills District, ki pulit ka District ha ryngkat ka Hynñiewtrep Achik National Movement (HANM) Eastern West Khasi Hills District lyngba ka ‘Anti Influx Operation Cell’ ki la pynlong ïa ka jingap pahara bad ka jingpeit pyrman ïa ka rung ka mih da kaba talasi bad peitngor ïa ka jingwan rung ki briew kiba nabar lyngba ka surok bah NH 44 E ha Lad Kyllang kaba hap hapoh ka Mairang Block.
U President ka HANM, u Bah Artis Ryntathiang u la ai ka jingkhublei ïa ka tnad Pulit jong ka Eastern West khasi Hills District kaba la lah ban ïasnohktilang bad ka seng ban ïadon bynta lang ha kane ka jingpahara ïa ki bar Jylla kiba khlem kot khlem sla kiba biang.
U la ïathuh ba ka seng ka la sdang ïa kane ka jingpahara hadien ba ka Sorkar Assam ka la pynlong ïa ka jingbeh ïa ki bar Jylla na ka Jylla Assam bad namarba ka Jylla Meghalaya ka don markhap bad ka Assam bad ka Ri Bangladesh kaba buh jingma lada ym shimkhia ba ïoh kin wan rung ha kane ka Jylla kaba rit paid.
Shuh shuh u la ong ruh ba ka seng ka la kyntu ïa ki paidbah nongshong shnong ban long kiba phikir halor kane ka kam bad lada lap ïa kino-kino ki bar Jylla ki bym shym la biang ki kot ki sla kin pyntip sha ki sengbhalang lane ha ki bor Pulit.
