Nongpoh, Nailar 01
U MLA jong ka Jirang konstitwensi, u Bah Sosthenes Sohtun u la pynpaw ïa ka jingsngewkhia jur halor ka jingkynnoh ba ka la don ka jingpyndonkam bakla ïa ka Queens Hotel kaba don ha Jorabat kaba katkum ka jingïoh jingujor ka jong u na ki paidbah ka thaiñ, la kynnoh ba ka la don ka jingpynlong ïa katei ka Hotel kum ka ‘Night Club’ bad ka jaka khalai.
U Bah Sosthenes Sohtun u la ïathuh ba katkum ka jingïoh jingujor ka jong u na ki paidbah, la ïathuh ba ha ki Sngi Thohdieng, Sngi Saitjaiñ bad Sngi U Blei, ki ju don ki kali remdor kiba ju pynïeng ha phyllaw katei ka Hotel, kaba la pynsuba sniew ïa kiba bun ki paidbah ba lehse ka lah ban don ka kam khalai bad ka ‘Night Club’ kaba la pynïaid be-aiñ ha katei ka Hotel.
Halor kane ka bynta, na ka liang ka jong u Bah Sosthenes Sohtun u la ïathuh ba u la dep ban ïakren bad u Deputy Commissioner ka Ri-Bhoi ba ki bor pynïaid District ha ryngkat bad ki bor pulit, ki dei ban pynlong ïa ka jingkhynra ha katei ka jaka ban lap ïa ki jingshisha kumba la kynnoh da ki paidbah bad ban pynduh jait ïa ki kam be-aiñ hapoh ka konstitwensi.
Kumban shu kdew katei ka Queens Hotel kaba don ha Jorabat ka dei kawei na kiba paw ha ki khyndiat snem kiba lah dep, ban pynlong kum kata ka jaka khalai Casino, kaba la mih ruh ka jingpyrshah jur na kiba bun ki liang bad khamtam na ki sengbhalang kiba paw ha Jylla kat haduh ba ka Sorkar Jylla, ka hap ban pynduh pyndam syndon ïa katei ka aiñ khalai.
