London, Nailar:
Uwei u nong UK uba dei na ka jaitbynriew Sikh, u la shah dung-iap ha ka thaiñ Mihngi jong ka London, ha ka jingleit thombor jong ki katto- katne kiba don jingithuh bad u.
Ia u Gurmuk Singh, la ju ithuh ruh kum u Gary bad u la khlad noh ha ka taïew ba la dep ha Felbrigge Road, hapoh Ilford jong ka East London bad la pynithuh kyrteng bad pyntikna pat ia ka jingiap jong u da ka tnat pulit katei ka nongbah ha ka Sngi Palei.
Ka kynhun pulit ka iathuh ba ki heh pulit jongka, ki la kem ia U Amardeep Singh, 27 snem ka rta, halor ka jingsuba halor katei ka kam pyniap briew kaba la jia ha ka 23 tarik Naitung bad naduh katei ka por, u la shah pynngat ha kawei ka kyndon pynkheiñ aiñ ba iadei bad ka jingpyniap briew bad un dang shah bat ha patok tad haduh ban da pyndep ia ka jingbishar ban sa iasaid hakhmat ka ïingbishar ha London, Old Bailey, ka ban long ha ka 5 tarik u Kyllalyngkot jong u snem 2026 u ban wan.
Ki nongtohkit ki la ioh kem ruh sa ia uwei pat u rangbah uba 29 snem ka rta bad lai ngut ki kynthei kiba 29, 30 bad 54 snem ka rta kiba la suba don kti ha katei ka jingjia bad ka jingpyniap ia utei u briew. Kine baroh naduh katei ka por ki la shah pyllait jamin haduh u bnai Risaw hynrei ka jingtohkit jong ki pulit ka dang iai bteng bad iaid sha khmat.
Ka iing ka sem jong u Gary, ka iathuh ba u Gary u long u briew uba sngewtynnad bha bad uba lah ruh ban pyniadei bad kiwei ha man ka jaka ba u leit ne u don.
Katkum ka jingpeit bniah ia ka met jong u, la shem ba ki don ki dak mynsaw bad dang shah dung tari ha ka bynta jong ka lbong ka diang.
Kumta ki pulit ki dang iai bteng ia ka jingtohkit kaba bniah bad ban bud-dien ruh ia kitei kiba la ioh ban kem khnang ba yn lap ia ka daw kaba shisha halor kaba iadei bad kane ka jingshah pyniap utei u jaitbynriew Sikh.
