Shillong, Nailar 01
Ka Executive Committee (EC) jong ka All India Football Federation’s (AIFF) ha ryngkat ka jingmynjur da ka Technical Committee (TC), ka la rai ban thung ïa u Khalid Jamil kum u coach uba thymmai jong ka kynhun ïalehkai (senior) ha ka jingïalang kaba la long ha ka sngi Thohdieng
Ha kane ka jingïalang la ïadon lang u President ka AIFF u Kalyan Chaubey, kumjuh u Vice President u N.A Haris, u Treasurer u Kipa Ajay, ryngkat ki dkhot ka Executive bad Technical committee ryngkat ki coach kiba la ïohpdiang ïa ka khusnam Dronacharya kata u Bimal Ghosh bad u Armando Colaco bad u Shabbir Ali uba la iohpdiang ïa ka khusnam Dhyan Chand, bad kiwei kiwei.
Na ka liang u Colaco bad u Ali ki la pynpaw ïa ka jingsngew jong ki ba ka AIFF ka dei ban buh hakhmat eh ban jied ïa u coach na India na ka bynta ka kynhun ïalehkai jong ki shynrang (senior). Baroh lai ngut ki la ai jingmut ba ha ka por ba ki danglong ki nonghikai, ma ki ruh, ki la long shisien ki nonghikai jong ka ri India ki bym don jingshemphang ha ka kynhun ïalehkai ka ri. Hynrei ki ngeit ba donkam ban ailad ïa ki coach jong ka ri India ban pynpaw ïa ka jingtbit jong ki.
U chairman jong ka Technical Committee, u I.M Vijayan, uba la ïohpdiang ïa ka khusnam Padma Shri bad Arjuna, u la ïathuh ïa ki jingshem jongu ha ki sngi ïalehkai jongu, bad u la ong ba ka India ka don ïa ka kyrdan kaba kham shakhmat ha ka FIFA ha kaba ki rangïalehkai barim kum u Sukhwinder Singh bad u Syed Nayeemuddin kum ki coach. Kumta, u la ai jingmynjur ïa u Khalid Jamil, namar ba u la dep shah pynkup burom da ka khusnam Coach of the Year jong ka AIFF ha ki ar tylli ki aïom ïalehkai (2023-24 bad 2024-25).
Hadien kata, kiba bun ki la pdiang ïa ki jingai jingmut jong u Technical Committee. U Vice President ka AIFF u Haris, ryngkat bad ki dkhot kum ka Pinky Bompal Magar, Thongam Tababi Devi, Climax Lawrence, Menla Ethenpa, Arif Ali, Mohan Lal, bad kiwei kiwei, ki la ai jingmut ba na ka bynta ka jingbha jong ka jingïalehkai phutbol jong ka ri India, ka AIFF ka dei ban ailad da u coach uba napoh ri India.
Ki jingai jingmut jong u Stephen Constantine ruh ki la wan na ki katto katne ngut ki dkhot jong ka EC. Hynrei hadien ka jingïakren kaba sani bha, ka ïing ka la rai ïa u Khalid Jamil.
Da kane ka rai ban pynkhamti ha u Khalid Jamil, ba dei artad u Coach ka Jamshedpur FC ka klob kaba iakhun ha ka ISL, un shimti ia kane ka kam na u Manolo Marquez jong ka Spain, kaba ïa mynta ka por kam da don than eh ha u namar mardor un hap ban pynkhreh ban thaw ïa ka kynhun ïalehkai ka ri ka ban khreh ban ïa iareng ha ka lympung ïalehkai jong ka CAFA Nations Cup 2025 bad ka AFC Asian Cup Final Round Qualifier pyrshah ïa ka Singapore ban long ha u bnai Risaw mynta ka snem.
