Jowai, Nailar 01
Kan long ka jingkyrkhu kaba khraw ïa ki hajar ngut ki nongtrei jong ka Council ki bym pat shym la ïoh tulop mynta la bun tylli ki bnai, namarba ka Sorkar Jylla ha ka 1 tarik Nailar ka la pyllait ïa ka pisa kaba kot T.35 klur sha ka Jaiñtia Hills Autonomous District Council (JHADC) kum ka bhah khajna jong ka na ki marpoh khyndew kynthup ka khajna lyngba ki kali na bynta u snem mang tyngka 2025-2026.
Ïa ka ‘Sanction Order’ la pynmih da ka tnad District Council Affairs bad kaba la mynjur da ka Tnad Finance (EC-II) la pdiang da u Chief Executive Member (CEM) ka JHADC, u Bah Thombor Shiwat, u Deputy CEM, Bah Lasky Rymbai bad u Chairman ka Planning Board, u Bah Moonlight Pariat na u Symbud Myntri Rangbah ka Jylla, u Bah Sniawbhalang Dhar.
Na ka liang u CEM u la pynthikna ba kane ka pisa ka la poi shapoh Treasury bad mynta ka jingpynkhreh ban pyllait ïa ki tulop ba sahteng jong ki nongtrei ka la ïaid shakhmat.
Ka konsil ka donkam T.8.45 klur man u bnai ban pyndap ïa ka tulop bad ka baibam jong ki nongtrei. Namar ka jingpynslem ban ïoh pdiang ïa ka bhah khajna, haduh palat 1,100 ngut ki nongtrei ka Council kim shym la ïoh tulop mynta lah hynñiew bnai.
Ha ka Dorbar Lyiur jong ka konsil kaba la long ha ka 24 tarik Naitung, ka jingeh kaba ïadei bad ka tulop ka dei ka mat ïatai kaba hakhmat eh, ha kaba ki dkhot na ki seng bapher-bapher ki la pynpaw ïa ka jingsngewkhia kaba jur.
Kine ki MDC ba mynta ruh ki la hap ban ap ïa ka tulop jong ki mynta lah palat lai bnai.
Kane ka T.35 klur la khmih lynti ba kan pynduna ruh ïa ka jingeh jong kane ka Executive Committee ba mynta kaba la shah kynthoh jur halor ka jingeh kaba ïadei bad ka jingkyrduh pisa.
