Itanagar, Nailar:
U Myntri Rangbah ka Arunachal Pradesh, u Pema Khandu, u la ïaroh ïa ka jingthmu ba nyng-kong eh jong ka District Urban Development Agency (DUDA) ha Roing, kaba pynïasoh beit ïa ka kamram nongshong shnong bad ka jingpynneh pynsah ïa ka kolshor.
Ha ka jingthoh ha ka social media, u Khandu u la ai jingïaroh ïa kane ka jingpyrshang, da kaba ong, “Kaei kaei kaba don jingmut ka dang jia ha Roing,” bad u la ïaroh ïa ka DUDA kaba “ïalam da ka jingthmu bad ka jingpynwandur.”
Ka Roing, kaba dei ka jaka treikam jong ka Lower Dibang Valley, ka la kylla long ka nuksa jong ka jingsynshar kaba thymmai ha kaba ki kali lum jaboh ki la bujli ïa ki jingpynsawa kiba pynsawa ïa ki jingrwai da ki khubor ba la shon ha ka ktien Idu Mishmi-ka ktien tynrai kaba la ithuh da ka UNESCO kum “kaba la jan duh jait.”
Ka jingthmu ka pynpoi ïa ki khubor jong ka jingkhuid jingsuba man ka sngi katba ka pynim biang ïa ka ktien kaba la kren da ki briew kiba duna ïa ka 12,000 ngut.
Haba batai ïa ka jingpyrshang kum “ka jingkylla kaba suk hynrei kaba pyrkhat bha kaba pynïasoh ïa ka jingkhuid bad ka jingpynneh pynsah ïa ka kolshor,” u Khandu u la kdew kumno ki jingshakri sorkar ba man ka sngi ki lah ban long ki rynsan ban pynskhem ïa ka jinglong bad ka jingsngew sarong. Ki khubor ba la pynbna ha ki por ba lum jaboh ym tang ba ki pynshlur ïa ki briew ban pynkhuid ïa ka sawdong sawkun jong ki hynrei ki pynkhraw ruh ïa ka dor jong ka ktien bad ka pateng jong ka thaiñ.
Ka jaitbynriew Idu Mishmi, kaba kham bun ka shong ha ka Khlaw Dibang kaba shapoh, mynta ka ïohsngew ïa ka ktien tynrai jong ki kaba sawa ha kylleng ki jaka paidbah-ka jingpynkynmaw man la ka sngi ïa ki tynrai kolshor ba riewspah jong ki.
Ka jingthmu ka la ïoh ïa ka jingïaroh na ka bynta ka jingktah kaba arliang, ban pynkhlaiñ ïa ka jingsngewthuh shaphang ka jingkhuid jingsuba bad ban pynim biang ïa ka pateng jong ka ktien tynrai.
