Amlarem, Nailar 03
Ha kawei ka jingjia, arngut ki khun kila ujor ejahar pyrshah ïa u Kpa jong ki u Kmen Pohthmi halor ka jingkynnoh ba u la pom da ka tukri ïa ka Kmie jong ki, ka Kong Inmon Sumer na ka kti ka diang haduh ban da dkut ka kti ka diang jong ka.
Kane kala jia ha ka 2 tarik Nailar ha ka shnong Krangpamtadong, kaba hap hapoh ka thanad Amlarem.
Katkum ka ejahar ba la ujor ha u ophisar in-charge ka thanad Amlarem, la ïathuh ba u Kmen Pohthmi, mynta la kumba katto katne bnai u la wad daw wad nia bad pynmih ka jingïakajia hapoh ïing poh sem wat hadien ba kila ïashong ïasah mynta la 27 snem tam eiei.
Kumta ha ka 02/08/2025 ha ka por kumba 12:30 eiei katba ka Inmon Sumer bad u khun jong ka, u Wanmi Sumer ki dang ïa bam ja, kyndit kyndit u Kmen Pohthmi u la rung ha kamra shetja ryngkat bad ka tukri bad khlem kren eiei u la pom artad ïa ka Inmon Sumer na ka kti ka diang haduh ban da dkut ka kti jong ka.
U Wanmi Sumer uba don hangta u la pyrshang ban ïarap ïa ka kmie jong u hynrei ma u ruh u la shah pynmynsaw da ka tukri ha la u jong u kpa trai na ka bynta ka ngap jong u.
Ki khun ki suba ba u kpa u Kmen Pohthmi u la don lypa ka jingthmu ban pynïap ïa ka kmie jong ki hynrei donbok ba u don u Wanmi Sumer bad da ka jingïohsngew ïa ka jinglynniar jong ka Inmon Sumer bad u Wanmi Sumer kumta u Diei Sumer, ka Diparup Sumer bad u Ludihynmuh Sumer kiba long ki khun jong u Kmen Pohthmi hi kiba don ha kiwei pat ki kamra jong ka ïing ki la leit ban leit ïarap ïa kine kiba mynsaw bad leit buh ïa ki mar mar sha Woodland Hospital Jowai.
Kumba long mynta ka Inmon Sumer ka dang don hapoh ICU hapdeng ka jingshitom ba jur kumjuh ruh ïa u Wamni Sumer la ai jingsumar ha kajuh ka Hospital.
Ki khun ki dawa na ki bor ka aiñ ban pynshitom tyngeh ïa u kpa u bym don shuh ka jingsngewlem ïa ka jingim briew kat haduh ba u thmu ban shim ïa ka jingim jong ka kmie jong ki.
Ïa u Kmen Pohthmi ki pulit kila kem noh bad mynta u la don hapdeng ka jingshah tohkit.
