Hato don kiba tip thikna ïa kane ? Mano keiñ ki ban tip ïa ka mynnor ba naduh ki spah ki hajar snem mynshuwa. Ngi shu bud ïa ka jingïathuh pateng ki kmie ki kpa, hynrei ngi dei ban shim nuksa na ki lum ki them bad ka jing-long ka mariang. Haba phai ha ka mynnor ne ki por ba la dep da ki hajar snem mynshuwa,hato ngi tip seh ba mangi kum ka jaitbynriew Khasi nangne ngi wan? Bad hato ngi shim jait kheiñ jait na u kpa ne ka kmie ? Hato kita kiba wan kiew bad wan hiar na u Lum sohpetbneng ki dei ki kynthei ne ki shynrang. Haba ngim tip ïa ka jingshisha ngi dei keiñ ban pynshong nongrim keiñ ha ki lum ki them ka ri Khasi kum u Lum sohpetbneng, u Lum Raitong, u Lum Shyllong, u Lum Kyllang, u Lum Symper u Lum Sonaraja u Lum Tiniang, u Lum Rableng, u Lum Mawthadraishan, u Lum Bah Bo bah kong, La jan baroh ki lum ki dei kiba la pynpaw kyrteng kum ki shynrang.
Dei tang u Lum ka Iawpaw uba dei u lum kynthei. Te haba peit bad bishar na ka jinglong ki lum ki them dei tang u Lum ka ïawpaw marwei uba dei u Lum ka kynthei. Kane ka pyni ba ngi ki Khasi mynshuwa ngi shim jait na u Kpa uba long u khlieh jong ka ïing ym na ka kmie kaba long ka nongri nongsumar ïing sumar sem. Namar baroh kiei kiei ki long tang ka jingantad suda bad ngi wan poi nangne, ngi shong ngi sah hangno bad ngi ai jait kheiñ jait kumno ? Ym don ka jingshisha ba ngi ki Khasi ngi dei ka jaitbynriew kaba la buh kyrpang da u Blei bad ka sim jait ai jait da ka jingmynjur jong u Thawlang ka ïawbei kiba im ha ki spah snem, ym da ki hajar snem.Te ha ki hajar snem mynshuwa ioh ba ngi shim jait kheiñ jait na u kpa kumba long lem kiwei kiwei ki jaitbynriew ha satlak ka pyrthei. Mano ban tip ïa ki por barim bajah khelm da don ka jingthoh kaba shai. Kumjuh ka jingai jait jongngi ki Khasi ruh ngi shubud ïa ka khana pateng ki longshuwa manshuwa ym don ka sakhi kaba thikna bad kaba shai ba ngi ai jait kheiñ na u kpa ne na ka kmie.
C. B. Iawphniaw
