Mairang, Nailar 03
Ka ophis jong ka Directorate of Health Services Department ka tnat Health and Family Welfare lyngba ka Meghalaya State Price Monitoring & Resources Unit ka la pynlong ïa ka seminar on Regulation of Medicine Prices By NPPA and Introduction of “Pharma Sahi Daam” ha conference hall jong ka Tirot Sing Memorial Civil Hospital Mairang.
Ka jingthmu jong kane ka prokram ka long ban ai ka jinghikai sha ki pharmacist lane ki nongdie dawai jong ka district ba kin tip shaphang ki dor ki mur ‘MRP’ jong ki dawai kiba la buh da ka Sorkar khnang ba kan ym don kano kano ka jingpynheh ïa ki dor jong ki dawai da ki kompeni kiba pynmih dawai.
Ha kane ka prokram la wan ban ïadonlang u Bah M Diengdoh, MCS, Additional Deputy Commissioner, Bah PS Marwein, District Superintendent of Police, Dr T. Lyngdoh Medical Superintendent Tirot Sing Memorial Civil Hospital Mairang, Bah M Siangshai, Project Coordinator of MSPMRU bad kiwei.
La ïoh ruh ïa ka jingbatai pynshai halor ka jingtreikam jong ka NPPA kaba peit ba khmih ïa ka dor ka mur jong ki dawai, kaba peit ruh ka jinglah ban pynbiang ïa ki dawai katkum ka jingdonkam jong ki paidbah. Shuh shuh ha kane ka sngi la pynithuh ïa ka Pharma Sahi Daam App, na ka bynta ka dor MRP jong ki dawai khnang ban lait na ki jingshah thok ha ka dor dawai bad ruh lyngba kane ka app, ki paidbah ki lah ban phah ïa ki jingujor jong ki lada don ki pharmacy kiba shim tam na ka dor.
Haba kren kum u kongsan, u Bah M Diengdoh u la ong ba kum ka district ki ju ïathir ïa ka jinglong jingman ki pharmacy hapoh ka dong ka thaiñ bad ki kynhun kiba dei ban jngoh ïa ka koit ka khiah ki don ka jingïaleit ïa wan ban pynlong ïa ki jingjurip ha ki dukan bad kane kaba ki leh ka long ban pynbha ban pynjanai ïa ka kam ban pynshngaiñ ban pynbha ïa ka imlang sahlang bad ban ïoh ïarap kham kloi ïa kiba pang ba shitom.
U la ong ruh ba ka jingsngewkhia jingmut ka long ba baroh kine kiba don jingïadei bad ki dawai dashin ki shah teh ha ki aiñ ki kyndon na ka bynta ka bit ka biang ka bha ka miat bad ruh ban kyntiew lem ha ka koit ka khiah kaba shajrong ïa ka district kaba thymmai.
Ha kane ka jingïalang, la ïoh ruh ka jingkren na u Deputy Superintendent of Police, u Bah PS Marwein, uba la ai ka jingpynshai halor ka jingkiew stet jong ki briew kiba kyrni ha ka jingdih drok. Ha kaba ïadei bad kane, u Bah Marwein u la kyntu jur ïa ki trai dukan die dawai ba kin long kiba peitngor bad kiba husiar bha, khamtam ha ka por ba don ki briew kiba wan thied dawai kum ki thyrnia injek ne kiwei pat ki jait dawai kiba lah ban pyndonkam bakla.
La sakhi ïa ka jingdon ki nongdie dawai ha ki pharmacy bapher bapher, ki trai dukan ki supplier, ki riewshemphang na ka tnat ka koit ka khiah bad kiwei.
