Jowai, Nailar 03
Ka lympung ïalehkai 2nd Division-Joybell Suiam Memorial Football League baka pynïaid da ka Thadlaskein Sports Association (TSA) ka la sdang ha ka 2 tarik Nailar ha madan Wahiajer Multi Sports Complex.
La don 33 tylli ki kynhun ba la ïashim bynta ha kane ka lympung ïalehkai ba la ai nam ha ka kyrteng ka kmie jong u MDC ka Moodymmai Nongkhroh Constituency u Ma Jesse Suiam.
Ha shwa ka jingïalehkai, ka la don ka jingïalang ba la pynïaid da u President ka TSA Ma Kmenlang Shylla ha ka jingdonlang u MDC Ma Jesse Suiam bad la ïoh ka jingkren na u General Secretary TSA Ma Ebormi Lyngdoh, u waheh Shnong Wahïajer Ma Sanwotki Laloo nalor kiwei de ki nongkitkam ka TSA.
Ha ka sngi sdang ka jingïalehkai ka la long hadpeng ka Laru SC pyrshah ïa ka Lad Mukhla ha kaba ka Laru SC ka la jop da 3-0 kol. Ha ka jingïalehkai kaba bud, ka Thadmusem kala jop da 2-1 kol pyrshah ïa ka Modop SC.
Ka jingïalehkai kan bteng ha ka 4 tarik Nailar hapdeng ka Iongshiwiat pyrshah ïa ka Maskut ha ka por 10.00 baje mynstep, ka Namdong-A pyrshah ïa ka Mukhla Wahshnong ha ka por 12.00 baje mynsngi.
