Shillong, Nailar 03
Ki shipai ïada khappud (BSF) Meghalaya Frontier ha ka sngi Saitjaiñ ki la ong ba ki video kiba pyni ba ki nong Bangla-desh ki la tuh ïa u dewïong na Meghalaya ka dei ka kam jingleh bymman jong ki riew sniew na Bangladesh ban pynsniew dur ïa ki shipai BSF.
Ka video jong ki briew ba la ïohi ba ki kit ïa ki byrni ha ki tyrpeng jong ki, ka la saphriang bha ha ki rynsan social media.
Ki nongshong shnong jong ki shnong bapher bapher kiba don ha shilynter jong ka India-Bangladesh hapoh ka South West Khasi Hills district jong ka jylla Meghalaya, ka la kam ba ki nong Bangladesh ki la wan rung tuh tang da ka jingthmu ban tuh na India.
Ki kam tuh jong ki riew shim kabu na Bangladesh ki la jia ha ki jaka kum ha Borsora, Cheragoan, Rongdu, Bagli, Kalagoan, Rajaju, Lakma, Sawlymbor, Nongjri bad Nonghyllam kiba don ha khappud bad ka ri Bangladesh.
U Inspector General jong ki BSF ba dei khmih ruh ïa ka Meghalaya Frontier, u O.P. Upadhyay u la ïathuh ha ka UNI ba kine ki video kiba la paw ha ki social media ki dei kiba la rim bad kiba la buh da ki nongleh kam sniew na Bangladesh ban pynsniew dur bad pynthohbria ïa ki shipai BSF namar ba ki shipai ki la peitngor bha ïa ki kam khaïi beaiñ.”
Ha ka 20 tarik u bnai Jymmang, 2025, da ki spah ngut ki nong Bangladesh ki la rung tuh shapoh u pud u sam jong ka India ban lum ïa u dewïong uba la shah rong noh namar ka jinghap slap na ka jaka bret dewïong ha Cheragoan, South West Khasi Hills.
U la ong ba ki BSF ki la siat sha suiñ ban beh krad ïa ki runar kiba thmu rung sha India.
