Shillong, Nailar 03
U Nongïalam ka Nation-al People’s Party (NPP) uba dei ruh u Symbud Myntri Rangbah ka Jylla u Bah Sniawbhalang Dhar u la ong ba ki la don katto katne ngut ki nongïalam kiba la pynpaw ïa ka jingkwah ban pynïasoh ïalade sha ka NPP namar ka jingtrei-kam kaba khlaiñ bad ka jingsynshar kaba bha hapoh ka Sorkar Megha-laya Democratic Alliance (MDA).
“Nga tharai ba kin nangbun ki nongïalam ki ban pynïasoh sha ka NPP. Namar ka jingtrei-kam ba bha jong ka Sorkar MDA hapoh ka jingïalam jong ka NPP, kumta kiba bun ki nongïalam saiñ pyrthei ki la pynpaw ïa ka jingkwah jong ki ban rung sha ka NPP khlem kano kano ka jingpynbeit ne buh kyndon,” ong u Bah Sniawbhalang haba jubab ïa ka jingkylli halor ka jingïasoh ba dang shen jong u MLA ba marwei ka Congress na Mylliem u Ronnie V Lyngdoh, kaba la pynlong ïa ka Congress ban nym don nongmihkhmat shuh hapoh ka ïingdorbar kaba don 60 ngut ki dkhot.
Haba kylli hato ka NPP kan leit ïakren ïa ki MLA jong ka TMC, u Bah Sniawbhalang u la pynskhem ba ka NPP kam dei kaba peit tang ïa kano kano ka seng saiñpyrthei hynrei ka plie ïa ka jingkhang jong ka ban pdiang sngewbha ïa kino kino kiba kwah ban pynïasoh.
Halor ka jingkynnoh jong ka Congress ba ka NPP ka “thied” ïa ki MLA, u Bah Sniawbhalang u la ong ba ka jingkiew jong ka seng ka dei namar ka jingtreikam jong ka, kaba khring pat ïa ki nongïalam na kiwei ki seng ban ïasoh bad ka.
U la ai jingmut ban nym pyndonkam ïa ka kyntien “thied” ban batai ïa ka jingwan ki dkhot thymmai, da kaba ai jingmut ba ka lah ban pynjah burom bad pynjah burom ïa ki dkhot ba donburom kiba rung sha ka seng.
“Namar ka jingtreikam jong ngi, baroh ki nang shah khring sha ka (NPP). Sngewbha wat pyndonkam ïa kata ka kyntien (thied MLA) lym kumta ki briew kin rkhie bein ïa phi. Ka kyntien thied kam dei kaba dei. Ka lah ban khring sha ka jingshah ai mukotduma pynjah burom. Ki (MLA) ki dei ki dkhot ba donburom, balei pynhiar kyrdan ïa ki. Ki la pynpaw shai ba namar ka jingtreikam ba bha jong ka Sorkar hapoh ka jingïalam jong ka NPP, ngi la shah khring ban pynïasoh bad ngi la thikna ba ka Sorkar ba la ïalam da ka NPP, ka roi ka par ka wan,” la ong u Symbud Myntri Rangbah.
Ha kaba ïadei bad ka ilekshon 2028, u Bah Sniawbhalang u la ong ba ka thong jong ka NPP ka long ban ïoh ïa ka jingbun paid kaba marwei, da kaba buh thong ban ïoh palat ïa ka 35 ngut.
Hynrei, ha kajuh ka por u la ai ruh ka jingkular ba wat lada ka seng ka ïoh marwei ïa ka jingbun paid, kan dang pynneh ïa ka jingïatreilang jong ka bad ka United Democratic Party (UDP), ka paralok ba ju ïatreilang.
Haba kylli hato kan don ka jingai shuki Myntri na ka bynta u Bah Ronnie V Lyngdoh, u Bah Sniawbhalang u la ong ka shong ha u Myntri Rangbah ka jylla u Conrad Sangma, da kaba kdew ruh ba u Bah Ronnie u la rung sha ka NPP khlem kano kano ka jingbuh kyndon.
