Kyiv, Nailar:
U President ka Ukraine, U Volodymyr Zelensky, ha ka Sngi Palei, u la kyntu ïa ki paralok jong u, ba kin wanrah ïa ka jingkylla ha ka rukom synshar ha Russia. Kane ka long tang hadien katto- katne kynta hadien ka jingleit thma jong ka Russia da ki drone bad ‘namding sha ka nongbah Kyiv, kaba la shim ia ka jingim jong ki 16 ngut ki briew kynthup ïa uwei u khynnah ba dang 6 snem ka rta.
Ki jingshah thombor ha ka miet Sngi Palei ka la pynjulor bad pyn-um ia ka bynta jong kawei ka iing kaba hynñiew mala ha ka thaiñ ba Shathie jong ka nongbah Kyiv bad kumba 150 ngut ruh ki la ngat bad mynsaw ha katei ka jingleit thombor ba thymmai jong ka Russia pyrshah ia ka Ukraine, wat hapdeng ki jingiakren bad ka jingpynbor jong ka US ia ka Russia ba kan sangeh noh ia ka jingleit thombor sha Ukraine.
Ha kajuh ka por, ki shipai Russia ki la kam ba ki la ïoh ban knieh noh ïa ka Chasiv Yar, ka shnong kaba don ha rud lum kaba kongsan bha ha ka thaiñ mihngi jong ka Ukraine ha kaba ki arliang mamla ki la ïakhun tyngeh la bun bnai.
Ka Russia ka la pynjur ïa ka jingleit hiar thma ba shyrkhei jongka sha Ukraine ha kine ki bnai ba la dep, da kaba pyrshah ïa ka jingpynbor jong ka US ban pynkut noh ïa ka jinghiar thma jong ka kaba la jan lai snem shiteng katba ki shipai jong ka ki dang ïaid shakhmat ha madan thma.
Haba kren lyngba ka virtual ha ka jingïalang kaba rakhe ïa ka jingdap 50 snem naduh ba la soi ïa ka Helsinki Accord ha ka por jong ka thma bah ba ar, u Zelensky u la ong ba u ngeit ba lah ban “pynbor” ïa ka Russia ban sangeh noh ïa ka thma ha Ukraine.
Hynrei u la ong ba lada ka pyrthei kam lah ban pynkylla ne wanrah jingkylla ha ka bor synshar ha Russia, kiwei ruh ki para marjan ri ki don hapdeng ki jingma kiba khraw kiba ka Russia ka lah ban leit thombor bad sdang hiar thma hi dalade kumba ka la leh ia ka Ukraine ha kine ki snem.
