Shillong, Nailar 03
Ka Sur U Paidbah ka Bri Hynñiewtrep (KSUPB7T) ha ka 2 tarik u Nailar, 2025, ka la lah ban pynlong ïa ka jingïalang paidbah ha Soso Tham Auditorium, Shillong, kaba ka mat ïakren ka dei ban pynshai paidbah halor ki jaka ha khappud kiba don ha ka jingïakajia hapdeng ka Jylla Megha-laya bad Assam.
Ha kane ka sngi kiba la wan ban pynshai shap-hang u pud u sam ki dei ki riew rangbah kiba don ïa ka jingtip shaphang ki jaka kiba don ka jingïa kajia ki kynthup ïa u Bah Marcus M Thaiang halor ka Block I, u Bah Blik Star Sohtun uba dei u President jong ka Synjuk Ki Rangbah Shnong jong ka thaiñ khappud Block II, u Bah Wandel Passah uba la kren kyllum, ka jingkren na u Syiem Khynnah ka Hima Nongkhlaw, u Paiem Phrestar Manik Syiem, ka jingkren na u Adviser ka KSUPB7T, Bah Rastingwell Thabah, na u President ka Synjuk ki Rangbah Kur ka Bri Hynñiewtrep, Bah Livingstone Kharpran bad ka la don ruh ka jingpynsngew ïa ka kyrwoh kaba la shu phah da u Welstone Marak halor ka Maikhuli , bad ïa ka Labang Nongphyllut Doloiship da u Bah Wandame Sungoh.
Ha kaba kut jong ka jingïalang ka la don ruh ka jingkren kaba la kren da u Chairman bathymmai jong Ka Sur U Paidbah ka Bri Hynñiewtrep (KSUPB7T) u Bah Kyrmenlang Uriah uba la pynbna ruh ia ka rai jong ka jingïalang.
Ki nongkren kiba ai jingkren ha katei ka sngi jan baroh ki la pynsngew ba Ka Sur u paidbah Bri Hynñiewtrep kadei ban phah ïa ka kyrwoh sha ka Sorkar Jylla kaba dei ban ai ka jingkyrmen ïa ki paidbah kiba sah ha khappud ba kin don ha ka jingshong suk bad shong shngaiñ ym ban shu shong sah ha ka jingtieng ïa ki bor Sorkar Assam bad ka la don ruh ka jingkyntu ba lada ka Sorkar Jylla kam patiaw, kadei ba sa shisien lyngba Ka Sur U Paidbah dei ban leit kiew ïing lieh ïing saw kata sha Supreme Court.
Haba kren pat ban pynbna ïa ka rai jong ka jingïalang, u Chairman Ka Sur U Paidbah ka Bri Hynñiewtrep, u Bah Kyrmenlang Uriah u la ong, hadien ka jingpynleit jingmut ïa ki jingai jingmut, ki jingpyntip kiba la ïoh ban sngew na baroh ki nongkren kaba ki la dep ban buh rikod, ka KSUPB7T kan sa pynwan ha ka dur jong ka dorkhas ka ban kynthup halor ki jingtip baroh shaphang u pud u sam.
U la pyntip ba ka dorkhas kaba yn leit sha ka Sorkar Jylla ka dei kaba yn sa pynbeit da Special Committee kaba ka KSUPB7T kan sa thaw kaba yn don ka jingïatreilang bad ki riew rangbah, ki longkmie, ki samla kynthup ruh ki nongïasaid aiñ kiba don ka jingtip halor kane ka mat bad hadien kata, ka Executive Committee kan sa leit ban aiti sha ka Sorkar Jylla.
Haba ban pat halor ka jingïoh sngew ïa ka jingpyntip kaba la pynsngew da ki nongkren kiba shakhmat, u Chairman ka KSUPB7T u la ong, kat kine ki jingeh kiba ki nongshong shnong ki ïakynduh ha khappud ka pynpaw ba ka Sorkar Jylla kam don ka jingkitkhlieh ïa la ki jong bad ban bynrap da kaba ong, ka la dei ka por ba ha ka ilekshon MLA 2028, ki seng saiñpyrthei ki dei ban sangeh ka buh ïa ka kam khappud ha ka mat treikam jong ki namar kaei kaba paw, ka long ba baroh ki kut tang ha ka jingïakren khlem da lah pat ban pynbeit.
Ha ka jingïoh sngew ïa ka jingïathuh na u rangbah uba na Block II ba ka Sorkar ka thmu ban aiti ïa ki 18 tylli ki shnong Khasi sha ka Jylla Assam, u Bah Kyrmenlang u la ong, ki nongmihkhmat kiba la shah jied ha u paidbah ki dei ban sngewthuh ba ka shi vote kaba ki ïoh kam dei kaba kin die ïa u paidbah hynrei ka shi vote ka dei kaba u paidbah u ai jingkyrshan na ka bynta ba kin trei ïa kaba bha tam bad ban ai jingmyntoi ïa u paidbah.
Shuh shuh, u Bah Kyrmenlang u la phah ruh ka kyrwoh sha ki paidbah ka jaidbynriew ba ha kane ka jingïakhun bad ki mat bapher bapher, kaba nyngkong eh kaba kum ki paidbah ki dei ban ïaleh ban klet ïa ka jingdon ka politik ha ka mynsiem namar lada kane ka don, kam pynurlong ïa ki mat jingdawa.
