Shillong, Nailar 03
Ka President ka Meghalaya Pradesh Mahila Congress ka Kong Joplyn Shylla ka la ong haba u Bah Ronnie V Lyngdoh, u MLA Congress na Mylliem Konstitwensi u la mih noh na Congress yn ym lah ban khang ïa u.
Ka la pynpaw ba kam sngewïahap ban mih u Bah RV Lyngdoh na Congress, u briew uba la slem ha ka Congress ban leit pynïasoh bad ka NPP.
“Ngim don ka jingïapher jingmut hapoh ka Congress namar ka jingmih ki MLA na ka Congress namar ki kwah ban don ha Sorkar namar kim lah ban shong ha liang pyrshah namar ki la mlien ban shong ha ka Sorkar,” ka la ong.
Ka la ong biang ba lada ki paidbah kiba stad kim dei ban duh jingkyrmen watla ki MLA kiba la jop ki mih noh na ka seng hynrei kin ïaineh namar dei tang ka Congress kaba ïada ïa ki jaidbynriew rit paid.
Shuh shuh ka la ong ba ha ka jingsynshar ka BJP ha Delhi bad ka NPP ha jylla bun ki samla kiba la pyndep jingpule ki shong ïing namar kim ïoh kam ïoh jam.
Ka Kong Joplyn ka la pyntip ba shen ba ka Congress kan sa pynthymmai nongkitkam ha Mylliem Konstitwensi na bynta ban pynkhreh ïa ka ilekshon MLA ha u snem 2028.
Kumban shu pynkynmaw ka Congress ka la jop 5 ngut ki MLA ha ka ilekshon ha u 2023 hynrei tang katto katne por ki 3 ngut ki MLA Congress kata u Dr. C Lyngdoh na Umsning, Bah Charles Mangar na Mawhati, Bah Gabriel Wahlang na Nongstoiñ ki la rung noh sha ka NPP kaba ïalam ïa ka Sorkar.
Kumjuh ruh ha ka 30 tarik Naitung, 2025 u Bah RV Lyngdoh u MLA na Mylliem uba la kham slem ha Congress u la mih khatduh ban leit pynïasoh sha ka NPP da kaba aiti ïa ka shithi sha u Lamphang ka ïingdorbar.
