Jowai, Nailar 03
U Symbud Myntri Rang-bah ka Jylla Ma Sniawbhalang Dhar ha ka 2 tarik Nailar u la wan ban ïashim bynta ha ka pro-kram ‘Youth for Progress’ bala pynlong da ka National People’s Youth Front (NPYF) jong ka 1-Nartiang Block ha Ummulong Dorbar Hall.
Ha kane ka prokram kaba don ïa ka motto ‘Empowering youth, shaping the future’ ne ka jingpynkupbor ïa ki samla bad jingpyndur ïa ka lawei, la wan ïashim bynta ruh da kiba bun ngut ki samla shynrang bad kynthei kumjuh ki khynnah skul, ki longkmie longkpa nalor u MDC JHADC u Ma Reforming Son Lamare.
U Ma Sniawbhalang Dhar ha ka jingkren u la ong, ka jingthmu jong kane ka prokram ka long ban pynshlur ïa ki samla ban long ki nongai kam ai jam, ym ki nongwad kam, da kaba u ai nuksa ruh ïalade ba u dei uwei napdeng ki nongai kam ai jam ïa kiwei.
“Nga dei uwei na ki nongaikam aijam bad uba long ruh u MLA u jong phi. Haduh 2450 ki longïing ki im ja tang na ka kompeni ka jong nga”, ong u Ma Sniawbhalang Dhar bad pynpaw pat ka jingbynñiaw namar bunsien hi ki briew ki ju don ïa ka jingmut jingpyrkhat kaba sniew kaba pynlong ïa u/ka ban ym lah ban kiew ha man ki liang.
U Ma Sniawbhalang u la pynshlur ruh ïa ki samla ban nym ap tang ha ki kam Sorkar, hynrei ban wad ki lad ki lynti ban sengkam sengjam lajong namar ka long kaba eh ba ki samla baroh kin ïoh kam Sorkar lada kim lah ban wan shakhmat ha ki jingpule, hynrei lyngba ka sengkam sengjam lajong kan plie lad pat ïa ki ba kin mih shakhmat lyngba ka buit bad ka sap kaba ki don ban seng kam bad ban ïeng ha la ki jong ki kjat.
Lyngba kane ka prokram ki samla kila ïoh lad ruh ban sngap ïa shibun ki jingbatai kiba ïadei bad ka sengkam sengjam ba la batai da u Skills Development Officer Ma Lambor Suchen, u General Manager, District Commerce and Industries Centre, Jowai Bah B Warjri, u Village Industries Officer KHADI Ma T Shadap bad na u Branch Manager jong ka Meghalaya Cooperative Apex Bank, Ummulong Branch Ma L. Nartiang nalor kiwei kiwei.
