Shillong Nailar 03
U Govinda u tynghsop ba pawnam ka Bollywood u ba ju tip paidbah kum u “Hero No.1” hynnin ka sngi saitjaiñ u la wan ïuhkjat ha ka Jylla Meghalaya ban plie ïa kawei ka Family Club kaba don ha Jorabat, kaba la ai kyrteng kum ka Pine Club.
Ka Club ka thmu ban ai ka jaka shongthaid kaba bha tam ha ka sngi kut taïew bad ka jaka ïakynduh lang na ka bynta ki longïing, ki nongjngohkai pyrthei, bad ki nongshong shnong.
Ha kane ka sngi plie ïa kane ka Club la wan ban sakhi lang da u James K Sangma u ba dei u Chairman ka Meghalaya Industrial Development Corporation (MIDC), u Atul Seth u ba dei u CEO jong ka Pine Club, bad u Mayborn Rapthap u ba dei u Vice President jong ka Club, ha ryngkat ki nongshah khot sngewbha, kiba ha ïing ha sem, bad ki nongïatreilang jong ka Club.
Haba kren ha katei ka jingïalang, u Govinda u la ïaroh ïa ka jingitynnad jong ka mariang jong ka Meghalaya bad ka jingpdiang sngewbha jong ki briew jong ka, da kaba batai ïa ki kum ki “riew don akor bad kiba don burom”.
U la pynpaw ka jingkyrmen ba ki briew kin dang ïai im ha ka jingïatylli bad ka jingburom markylliang.
U la ïaroh ruh ïa ka jingdon jong katei ka Club ha khappud, da kaba ong ba kan pynroi ïa ka jingïadei kaba kham jan hapdeng ki shnong kiba marjan.
U Vice President u Bah Mayborn Rapthap u la pyntip ba ka Pine Club kan treikam tang ha ki sngi kut taïew (sngi saitjaiñ bad sngi u Blei) bad kan pdiang sngewbha ïa ki nongshong shnong bad ki nongwan jngohkai ban wan pynjah thaid ïalade bad kin ïoh ruh ïa ka bam kaba biang.
U la bynrap ruh, ba la khmih lynti ba kane ka Club kan ïoh ban ai kam ai jam ïa ki samla trai ri kiba wad kam wad jam.
