Shillong, Nailar 03
U Iminstar Mawlong ka Meghalaya uba mynta u don ha Goa ha ka jingshahpyntbit na ka bynta ka kynhun ïalehkai jong ki khynnah shynrang U-17 jong ka ri India.
Utei u samla u dei uba don bynta ha ka Bhaichung Bhutia Football Schools Shillong bad u dei tang ma u hi u rangïalehkai na Meghalaya ba shah kynthup ha ka kynhun ki 12 tylli ki kyrteng ba la pynbiang da ka All India Football Federation, ha kaba kiwei pat ki dei kiba wan na Goa, Chhattisgarh, Mizoram, Manipur bad West Bengal.
U Iminstar u la long u nongïalehkai phutbol ba paw bha na ki samla ha kine ki ar snem ba la dep, hadien ba u la mihkhmat ïa ka Meghalaya ha ka Subroto Cup 2023 bad ha ka jingïalehkai phutbol jong ki khynnah rit ha ka National Football Championship 2024, ka kynhun ïalehkai U-16 jong ka Shillong Sports Association kaba la jop ha ka jingïalehkai ba nyngkong jong ka Meghalaya Youth League ha u snem ba la dep bad kumjuh ruh ka Madan SCC, ki nongjop jong ka SSA U-20 Fourth Division 2024.
Nangta u la leit ban ïasoh lehkai bad ka Nongkseh ha kaba u la long uwei na ki rangïalehkai ba dang khynnah tam ban thep kol ha ka SSA’s First Division.
Kane ka jingleit pyntbit jong u kan bteng haduh ka 4 tarik u Nailar.
