Guwahati, Nailar 03
Uwei u nongñiah trok na Meghalaya la kynnoh ba u la shah pynïap ha Guwahati hadien ka jingïakynad. Watla kane ka jingjia ka la jia ha ka 25 tarik u Naitung, 2025 hynrei ïa ka jingjop ha ka jingtreikam la pynpaw da ki Pulit ka Guwahati lyngba ka rynsan ‘X’ handle ba thikna jong ki ha ka Sngi U Blei, ka 3 tarik u Nailar.
Kane ka jingjia ka la jia ha 5 No. Goli ha Assam kaba hap hapoh u pud u sam jong ki pulit ka thanad Basistha, ha kaba utei u briew uba la tip kyrteng kum u Mathaios Lyngdoh, ba la 45 snem ka rta, la lap ba u la khlad noh na ki jingmynsaw kiba jur na ki bynta jong ka khlieh. U dei na ka jylla Meghalaya bad la ïathuh ba u trei ïa ka kam pynpoi mar. Ki pulit ki la trei stet hadien ba ki la ïoh ïa ka khubor halor katei ka jingshah pynïap lyngba ka 112 emergency helpline.
Ka jingtohkit ha kaba sdang, ka la kdew ba ka don ka jingïakynad hapdeng u Mathaios Lyngdoh bad u briew ba suba donkti, hadien kata la kynnoh ba utei u nongñiah trok u la shah thombor. La lap ïa uwei u dieng, ba la ngeit ba la pyndonkam ha katei ka jingthombor, na katei ka jaka, ryngkat bad kiwei ki sakhi.
Halor ki jingtip ba la ïoh bad lum ha ka por ba pynlong ïa ka jingtohkit, ka kynhun ki pulit ka la kem ïa u nongshah kynnoh na thanad Jowai ha Meghalaya. Utei u nongshah kynnoh u dei uba la tip kyrteng kum u Phridalin Dhar ba ju khot sin kum u ‘Free’ uba la 54 snem ka rta bad la ong ba u la phla ba u la leh ïa katei ka kam ha ka por ba ki pulit ki la tohkit ïa u.
Na ka liang jong ki pulit mynta kim pat kwah ban ïathuh shuh shuh ha kaba ïadei bad ka jingthmu bad ka jingtohkit ka dang ïaid shakhmat.
