Tura, Nailar 03
Ka umsaw kaba khlaiñ bha ka la ïoh ban rong noh ïa uwei u ophisar ka tnat ka rep ka riang, katba u dang thmu ban jam sha shiliang jong ka wah Ganol ha Sella Wari hajan Tura.
Kane ka jingjia ka la jia ha ka por mynsngi jong ka sngi U Blei bad ka jingwad ban ïoh pyllait im ïa une u ophisar ba la tip kyrteng kum u Teseng M Sangma, uba dei u ophisar na Ampati ha South West Garo Hills ka la ïaid shakhmat.
U Teseng M Sangma, uba sah ha MBOSE quarter hajan jong ka Dolampong kaba hap hapoh ka thanad Araimile, la ong ba ha kane ka sngi, u la don lang ryngkat bad ki bahaïing hasem ban leit bam khana ha Sella Wari kaba dei ka jaka bam khana, bad ong katba u dang pyrshang ban jam sha shiliang ka wah, ba ka um kaba khlaiñ bor ka la rong lang ïa u bad ban jahklep mardor hi, watla ka la don ka jingwad kaba mardor ïa une u ophisar.
Ka kynhun Search & Rescue Team na ka tnat Fire & Emergency Service, ki pulit ka Tura, lem bad ki nongngam um ba tbit ka thaiñ, kila ïa hiar sha kane ka wah ban wad ïa une u rangbah. Hynrei namar ka jingdum noh ka bneng, la pynsangeh noh ïa ka jingïawad ha ka por 7:30 eiei janmiet bad yn sa pynbteng biang lashai ka step sngi Nyngkong, ka kyrwoh kaba long katkum ba la phah da u Superintendent of Police ka West Garo Hills Abraham T Sangma.
Ka jingther jong u slap ba jur ha ka miet sngi Saitjaiñ, kala pynheh ïa ki wah ha kylleng ka rilum Garo kynthup ka wah Ganol ha Sella Wari.
