Shillong, Nailar 04
Ka All India Football Federation (AIFF) kan shong jingïalang bad ki CEO na ki phra tylli ki klob jong ka Indian Super League ha ka sngi Palei ha ka nongbah Delhi na ka bynta ban ïamir jingmut lang halor ka lympung ïalehkai phutbol hapoh ka ri.
Ha ka 11 tarik u Naitung, na ka liang ki bor pynïaid jong ka Football Sports Development Limited (FSDL) ki la pynbha ba ka aïom ïalehkai 2025-26 yn hap ban pynsangeh na ka daw ka jingbym lah ban pynbeit ha kaba ïadei bad ka kontrak.
Ha ka sngi kaba bud, na ka liang ka AIFF ka la ong ba kan shim ïa baroh ki sien jam ban pynthikna ïa ka jingïaid beit jong ka Indian Super League (ISL).
Ka Master Rights Agreement (MRA) kaba la don lypa hapdeng ka FSDL bad ka AIFF, kaba pynskhem ïa ka jinglong, ka jingtreikam, bad ka rukom ban pynïaid ïew jong ka ISL, kan kut noh ha ka 8 tarik u Nohprah 2025.
Da kaba kheiñ ïa ka por tynrai jong ka ISL naduh u Nailur haduh u Ïaïong, ka jingthmu na ka bynta ka samoi ïalehkai 2025-26 kan sdang lypa. Ki klob, ki nongpynbna bad ki nongkyrshan ki donkam ïa ka jingshai halor ki por, ki jingkular bad ki jingpynïaid ïew ban pynbeit ïa baroh ki bynta, ka jingsoi ïa ki nongïalehkai bad ki kam pynïaid ïew. Ka jingbym don ka jingpynbeit ka la pynmih lypa ia ka jingsngewkhia ïa baroh ki klob.
Lah ban kdew ha ka taïew ba la lah ka Odisha FC ka la pynbna ba kan pynkut noh ïa ka kontrak jong baroh ki rangïalehkai lem bad ki coach kiba don bynta bad kane ka klob namar ka jingbym thikna ha kaba ïadei bad katei ka lympung ïalehkai ISL mynta ka samoi.
Katba ka FSDL ka dangïai long ka nongpynïaid naduh u snem 2014, ki jingkren ba dangshen jong ka AIFF ki dangpyrshang ban pynbeit thymmai ban pynthikna ïa ka jingïaid beit jong ka ISL.
Te kumta ka jingïalang ha ka sngi Palei la khmih lynti ba kan long ka jingïakren kaba kongsan bha kaba ïadei bad ki jingeh jong ki klob, ka lawei jong ka ISL bad kiwei kiwei.
