Shillong, Nailar04
U Symbud Myntri Rangbah ka Jylla ba khmih ruh ïa ka tnat PWD (Roads) Bah Prestone Tynsong ula bthah ïa ka National Highways and Infra-structure Development Corporation Limited (NHIDCL) bad ruh ïa ka kompani ba pyntrei ïa ka project ba kin buh jingthoh dak (sinages) ba thikna ha ki jaka ba don jingma ha shilynter ka surok sha Pynursla.
U Bah Prestone ula shong bishar kam halor ka jingshngaiñ jong ka surok hadien ka jingjia hap kali shapoh ka riat Rngain, kaba la shim noh ïa 5 tylli ki mynsiem briew na kajuh ka longïing ha ka miet sngi U Blei.
Haba phah ïa ka jingsngewlem sha ki bahaïing hasem ki lanot, u Bah Prestone ula ong ba kane ka jingjia ka lah ban jia lehse namar ka daw ba u nongñiah u pyrshang ban knieh tam shakhmat ïa kawei ka trok ha kane ka thaiñ kaba jur u lyoh khyndew.
Katkum ka jingong jong u, ka jingtohkit kala ïaid mynta ban pynthikna ïa ki daw tynrai halor kane ka jingjia.
U la pyntip ba ula lum ïa ka jingïalang bad ka kompani ba pyntrei ïa ka project lem bad ka NHIDCL ban ïakren halor ki lad ki lynti ban wanrah ïa ka jingshngaiñ ki nongleit nongwan ha kane ka surok.
“Ka jingïalang jong nga bad ka kompani lem bad ka NHIDCL ka long ban pynthikna ba ïa ki jingbuh jingthoh dak (sinages) dei ban buh bha ha ki jaka kiba don jingma katkum ka jingïohi ïa ka jingdonkam,” ong u Bah Prestone haba kren sha ki lad pathai khubor.
Ula pyntip ruh ba u Chief Engineer ka PWD (National Highway) ruh ula pynbeit ban leit jurip ïa ki jaka kiba idon jingma ban pynthikna ïa ka jingbuh bha ïa ki jingthoh dak ha ki jaka kiba dei bad idonkam.
Haba kylli la kan don ka jingïarap song pisa sha ki nongïoh bynta jong kine ki lanot, u Bah Prestone ula ong ba ka jingtohkit ïa kane ka jingjia ka dang ïaid mynta bad ula dep bthah ïa u SDO Civil ban aiti ïa ka kaiphod, ka ban sa batai ïa kaei ka sienjam banshim haba ïadei bad ka jingïarap song pisa.
“Peit haba ïadei bad ka jingai jingïarap song pisa, ngam pat lah ban ong eiei ïa mynta namar ïa mynta, nga la bthah ïa u SDO Civil ban aiti ïa ka kaiphod. Ai ba ka kaiphod ban wan namar kumba nga ong ba phim lah ban tip la ka dei ka jingbakla jong u nongñiah ne ka jingbakla jong ka kompani ba pyntrei ïa ka surok,” ula ong bad bynrap “Nga pynpaw ïa ka jingsngewsih bad jingsngewlem sha ka longïing kaba mad ïa kane ka jingjia ba sngewsih. Jan baroh ki dkhot ka longïing kila ïap ha kane ka jingjia. Namar kata, nga kyrpad…to ngin ïa ap tad hadien bala aiti ïa ka kaiphod sha ngi bad ngin sa peit ïa kaei kaba dei ban leh”.
U Bah Prestone ula ban jur ba ka jingshngaiñ ha ka leit ka wan ha ki surok ka dei ka kam kaba la buh hakhmat eh bad ki bor khmih kila shim ïa ki lad ki lynti ban khanglad ïa kum kine ki jingjia ba kin nang jia hadien habud.
Halor ki ejahar bala mudui halor ki jingjia ba jia hapoh ka thaiñ Riat Rngain ha ki por bala leit noh, u Bah Prestone ula ong, “Ha ka jingshisha, phim lah ban ïanujor ïa ki jingjia ha ki por bala leit bad ka jingjia kaba la jia hynnin ka miet”.
