Shillong, Nailar 04
Hadien ka jingshah rem ha ka Shillong Lajong FC da 3-1 kol, ka Rangdajied United Football Club ka la khmih lynti ban ïalehkai bha na ka bynta ban wanphai da ka jingjop ha ka jingïakhun kaba ar jong ka Group-E ha ka 134th Durand Cup 2025 ha kaba kan ïakhun pyrshah ïa ka Malaysian Armed Forces FT ha ka sngi Ba-ar ha ka por 7 baje janmiet ha JN Stadium, Polo.
Ha kane ka jingïakhun ha la ïing hakhmat ki paidbah nongkyrshan, ka Rang -dajied ka donkam ban khur ïa ki 3 point khnang ban kyntiew shuh shuh ïa kane ka kynhun watla ka don shadien na ka Lajong kaba danglamkhmat ha kane ka group bad ka NorthEast United FC, kaba long ka lahduh ha ka u snem ba la lah.
Shi sngi hashwa kane ka jingïakhun, u coach ka Rangdajied u Aibanjop Shadap u la pynpaw da kaba ong, “Nga kyrmen ba ki rangïalehkai ki la ïoh jinghikai na ki jingbakla kiba ngi la leh ha ka jingïakhun kaba la dep. Te kumta ngin pyrshang ban pynïoh ïa ka jingïalehkai kaba bha tam ha madan, bad nga kyntu ïa ka kynhun ba kan ïalehkai da ka mynsiem ka jingkmen bad ban ïakhun na ka bynta abn khur ïa ka jingjop.”
Ha kawei ka liang katei ka kynhun kaba na Malaysia ka la mad ïa ki jingshah rem kata da 6-0 kol ha ka Lajong bad 3-1 kol ha ka NorthEast United. Kumba ka paw kane ka kynhun ka la sdang ban kiew ha ka rukom ïalehkai ha ka jingïakhun kaba ar pyrshah ïa ka NEUFC bad ha ka kylla miet ka la lah ban pynphai kylla shi kol lyngba u Muhammad Amir Faisal.
“Ngi tip ba manla ka jingïakhun ha kane ka lympung ka dei ka jingtynjuh bad kam don jingïapher bad ka Rangdajied. Ka jingthmu na ka bynta jong ngi ka long ban nangkiew ha kawei pa kawei ka jingïalehkai bad ban ïalehkai katba lah. Ki rangïalehkai ki long kiba kut jingmut ban ai ïa kaba bha tam ha kane ka jingïakhun,” la ong u Masrizar bin Mizalan, assistant coach katei ka kynhun ïalehkai na Malaysia.
Na ka bynta ka Rangdajied, ka jinglong adkar ka long kaba kongsan. Ki jingbakla ha ka jingïalehkai ki long ki daw bah jong ka jingshah rem ha ka jingïakhun kaba nyngkong, watla ki la pyni ïa ka jinglah ban ïalehkai bha. Te kumta kane ka kynhun ka donkam ban ïakhun tyngeh khnang ban pynurlong ha ka ban khur ïa ki lai point ha ka sngi Ba-ar.
Kumba ka paw ka Rangdajied United ka dangdon jingkyrmen ban jam sha kawei pat ka wat jingïakhun bad kane kan shong ha ka jinglah ban ïalehkai bha ha kine ki jingïakhun kiba dangsah.
