Shillong, Nailar 04
Ka Archery Association of India (AAI) ha ka lah sngi U Blei ka la pynbna ba kan pynlong ha ka sien kaba nyngkong eh ïa ka lympung ïakop siat khnam ba la tip kum ka Archery League, ha kaba yn ïashim bynta da ki nongïalehkai shynrang bad ki kynthei ha ka recurve bad compound kiba na kylleng ki ri ka pyrthei.
Kane ka lympung ka thmu ban kyntiew ïa ki nong siatkhnam jong ka ri bad ban kyrshan ïa ka jingïalehkai Olympic jong ka ri, bad ban kyntiew shuh shuh ïa kane ka jingïalehkai ha ka pyrthei. Ha kajuh ka por ka jingthmu jong kane ka lympung ïalehkai ka long ban pynkhlaiñ ïa ka jinglong jingman jong ka jingïakop siatkhnam ha kylleng ka ri India bad ha ka pyrthei hi baroh kawei. Ha kane ka lympung kin don ki nongsiatkhnam nabar ri kiba don hapoh ka thup kaba 10 ha ka pyrthei, ryngkat bad ki nongsiat khnam ba pawnam jong ka ri India ha kaba kin mihkhmat na ki kynhun jong ki.
Kane ka lympung kan ailad ïa ki nongsiat khnam na India ban nangkyntiew shuh shuh ïa kid a kaba ïashim bynta lang bad ki nongïalehkai ki ri ka pyrthei. Da ka jingpynbeit ïa ka kynhun kaba kyrpang kaba ym pat ju ïohi mynno mynno ruh ha ka jingïalehkai siat khnam ha ka pyrthei, ki nongsiat khnam recurve bad compound kiba siat 70mtrs & 50mtrs ryngkat hapoh ki jingshai, kane ka lympung kan kyntiew ïa ka jingshaniah jong ki nongsiat khnam na India bad kan kyntiew ïa ka kyrdan ïalehkai jong ki.
Na ka liang u President ka Archery Association of India, u Arjun Munda u la ong, “Ka jingangnud kaba ngi la pyrkhat ka dei ka jingangnud kaba la ïai im la bun snem ha man la ki samla siat khnam kiba sah ha kylleng ki shnong jong ka Ri India. Ki la khmih lynti ban ïoh lad ban pyni ïa la ki sap ha ki lympung ïalehkai kiba heh. Ngi ngeit skhem ba da ka jingiarap jong ka Archery League, ngin lah ban pynurlong ïa kine ki jingangnud bad ban ai shuh shuh ïa ki lad ki lynti. To ngin ïasnohkti lang baroh ban sdang ïa kane ka lympung na ka bynta ka jingsiat khnam khnang ba ngin lah ban rah ïa kane ka jingïalehkai sha ka kyrdan kiba kham shalor ha ka ri.”
“Ki nongsiat khnam jong ka ri India ki la wanrah ka jingsarong ïa ka jaidbynriew da ki jingïalehkai bha jong ki ha ka pyrthei. Ka jingjop jong ki ka long ka jingpynshisha ïa ka sap jong ki, ka jingtrei shitom, bad ka jingkiew jong ka kyrdan siat khnam jong ka ri India. Ngi la wanrah ïa ka Archery League, ka rynsan kaba don ïa ka jingïakhun kaba itynnad bad ban ïarap ban kyntiew wat shaduh ka Olympics. Kane ka long u mawjam sha ka jingangnud jong ka India ban ïakhun ïa ka Olympic,” la ong u Secretary General ka Archery Association of India, u Virendra Sachdeva.
Ïa kane ka lympung la khmih lynti ban pynlong ha ki 11 sngi kata ha u Risaw mynta u snem ha Yamuna Sports Complex, New Delhi. Kane ka Archery League ka la ïohpdiang ka jingai mynsiem lyngba ka World Archery, World Archery Asia bad ka Sports Ministry of India.
