Shillong, Nailar 04
Ka Hynñiewtrep Integrated Territorial Organisation (HITO) ha ka jingïalam jong u President ka HITO Umsning Circle, ha ka janmiet jong ka 4 tarik Nailar, 2025, ki la ïoh ban bat ïa ki bar jylla ki bym don ïa ki kot ki sla kiba biang na kawei ka kali kaba kit ïa kitei ki barjylla.
Ka seng kala ïathuh ba hadien ka jingïoh jingtip halor ka jingdon jong kawei ka kali kaba kiew na Khanapara bad kaba kit ïa kitei ki bar jylla, kala pynlong ïa ka jingap shrip bad ha kane ka jingap shrip ka la ïoh ban bat noh ïa katei ka kali bad ki bar jylla ha ka jaka kaba hap hapoh Umsning Umtrew, Ri Bhoi District.
Ka seng kala ong ba watla kam shym khang ïa ka jingkhot bylla da ki barjylla hynrei ka la buh jingmaham pat ba kino kino ki briew kiba ju mlien ban khot trei bylla da ki barjylla ki dei ban pynbiang shwa ïa ki kot ki sla jong ki.
“Kaei kaba ngi kwah ban ong mynta ka long ba kum ki paradoh parasnam ki dei ban pyrkhat lem naka bynta ka bha ka miat jong ka imlang sahlang bad jong ka jaidbynriew jong ngi namarba kaei kaba ngi ïoh mynta ka sngi ka pyni ka jingïasylla ki Khasi jong ngi kiba shu pynrung jubor ïa ki barjylla shapoh ka Jylla jong ngi khlem kino-kino ki kot ki sla ba biang”, ong ka seng.
Shuh-shuh, ka seng kala ban jur ruh ïa ka jingdonkam ban khmih ïa ka Police Verification ïa ki briew kiba wan rung shapoh ka Jylla khnang ban tip bad lap la kitei ki briew kiba wan rung shapoh ka Jylla ki don dak sniew ne kim don shapoh ka Jylla jong ki.
Ka seng kala buh ka jingmaham ruh ïa ki paradoh parasnam kiba ju ap ha ki khyrdop ba kim bit satia ban pynrung tuh ïa ki barjylla bad ong ba lada ka seng ka lap ïa kum kitei ki briew, kan sa shim da kiwei ki sienjam kiba tyngeh pyrshah ïa ki.
La ong ba kine ki bar jylla kim shym la don satia ïa ka Labour License hynrei ki don tang ïaka Acknowledgment Slip, kumta naka liang ka HITO Umsning Circle ka la phah ïa kitei ki bar jylla ba kin leit phai biang sha ka jaka ba ki wan da kaba maham ruh ba kim bit satia ban wan trei sha kane ka Jylla khlem ki kot ki sla kiba biang.
