Shillong, Nailar 04
U Nongïalam ka National People’s Party (NPP) bad uba long ruh u Myntri Sorkar, u Rakkam A Sangma u la pdiang sngewbha ïa ka jingwan pynïasoh dang shen jong u MLA ba marwei ka Congress na Mylliem, u Bah Ronnie V Lyngdoh sha ka NPP bad pynpaw ba ka jingwan pynïasoh jong ki nongïalam ba rangbah ka long ka jingkyntiew kaba khraw ïa ka seng bad ïa ki nongkitkam jong ka.
Haba kren bad ki lad pathai khubor ha ka sngi Lah Sngi u Blei, u Rakkam u la kyntait ïa ki jingkynnoh ba ka NPP ka pynleit jingmut ha ka kam khwai dohkha ïa ki MLA jong kiwei pat ki seng saiñpyrthei da kaba pynshong nongrim ïa ka jingïasoh bad ka jinglong nongïalam kaba ai mynsiem bad ki kam pynroi jong ka seng.
U Myntri u la ai burom ïa ka jinglong nongïalam ba shlur jong ka Seng, ba la ïalam da u Myntri Rangbah ka Jylla, u Conrad K Sangma, kaba la pynshlur ïa ki briew ban pynïasoh ïalade sha ka NPP.
“Ka NPP kam ju khwai, ka NPP ka ai mynsiem,” la ong u Rakkam haba bynrap “Lada don kiba sngewtynnad ne kiba ïoh mynsiem, ym don ba lah ban khanglad (ïa ki ban ïasoh bad ka NPP).”
“Namarkata, ka jingwan rung jong u nongïalam barim ka liang pyrshah bad u Chief Whip jong ka liang pyrshah sha ka seng ka long ka khana kaba pdiang sngewbha ïa ngi. Kane ka ai mynsiem shisha ïa ki dkhot kiba dang rit. Ki briew kiba la kham rangbah kiba wan rung sha ka seng ki long kum u kpa na ka bynta jong ngi bad ka ai jingkyrshan ïa ka seng bad ki nongtrei jong ka seng. Kane ka long ka jingpynshisha ba hapoh ka jingïalam ba shlur jong u Myntri Rangbah bad ki nongïalam ba ha khlieh duh jong ka seng ka long kaba ai mynsiem bad ki kam pynroi, ka seng ka aiti na ka bynta ka kam bad ka jingshakri jong ki paidbah. Kane ka kren shisha shibun,” u la pynpaw shuh shuh.
Haba kylli ïa ka bynta jong ka liang pyrshah, u Rakkam u la ong ba watla ka liang pyrshah ka long kaba kongsan hynrei ka dei ban long kaba tei.
“Ka shong ha ki (9 ngut ki dkhot jong ka liang pyrshah – 5 ngut ka TMC & 4 ngut ka VPP) ngim lah ban ong eiei. Ki don shibun ki jinglong jingman ha ka saiñ pyrthei. Ka jingpyrshah ruh ka long kaba kongsan bha hynrei tangba ki dei ban long ki nongpyrshah kiba tei na ka bynta ka Sorkar,” u la bynrap.
U la iehnoh ïa ka rai jong ki riew saiñ pyrthei shimet shimet ha ka jingsngew jong ki, da kaba kam ba ka saiñ pyrthei ka long kaba ïaid beit bad kaba ym lah ban tip.
