Jowai, Nailar 04
Ki pulit ka Anti-Narcotics Task Force (ANTF) ha ryngkat ki pulit ka West Jaiñtia Hills ki la ïoh ban kem noh ïa arngut ki nongkhaïi drok bad ïoh kurup haduh 52.02-gram u drok heroin hadien ka jingpynlong ïa ka jingpynap shrip ha ka step jong ka 4 tarik Nailar.
Kine ki arngut kiba la shah kem ki dei kiba la tip kyrteng kum u Milton Chakraborty ba ju khot sin Lucky bad u Kasimuddin.
Ïakane ka jingtalasi la pynlong hadien ka jingïoh ïa ki jingtip ba thikna da ka ANTF ha ka miet jong ka 3 tarik Nailar halor ka jingdon jong ki arngut ki suba nongkhaïi drok kiba rah ryngkat u drok bad wan da ka bos Night Super ka MTC na Silchar sha Shillong, ong u SP ka West Jaiñtia Hills, u Jagpal Singh Dhanao.
Kumta u la ong ba ki heh ka ANTF ha ryngkat ka jingïatreilang bad ki pulit ka thanad Jowai ki la pynlong ka jingpynap shrip ha ka jaka talasi ha Mihmyntdu, Soomer bad ïoh ban kem noh ïa kine ki arngut.
Ula ong ba ha ka por kumba 4 baje mynstep ki la ïohi ïa kane ka bos kaba don ïa u registration number ML03-0189 bad pynlong ka jingtalasi hapoh ka kyndon 50 jong ka NDPS Act ha kaba ki la ïoh ban kurup ïa ar synduk ki song thep sabon kiba don ïa u drok heroin na u Kasimuddin uba la buhrieh ha ka pla khmat bad ka patlun poh.
Laitylli ki synduk sabon ba la sop da ka plastik ïong la ïoh kurup na ka patlun poh jong u Milton Chakraborty.Hadien ba la tes la pynthikna ba u dei u heroin uba don ka jingkhia kaba haduh 52.02 gram.
Hadien ki pulit ki la register case pyrshah ïa kine ki arngut hapoh ka thanad Jowai hapoh ki kyndon 21(b)/29 jong ka NDPS Act.Ka jingtohkit mynta ka dang ïaid shakhmat ban lapdien shuh shuh ïa kiwei pat kiba donkti ha kane ka kam khaïi drok,” ong u SP.
