Mawkyrwat, Nailar 04
Ka Federation of Khasi Jaiñtia & Garo People (FKJGP) South West Khasi Hills District hapoh ka jingïalam u Bah Kenesjune LNonglait, President bad u Bah Balse Kharbani, Secretary ha ka 4 tarik u Nailar 2025 ka la leit ban khynra laisen khaïi (Trading Licence) ha ka shnong Umsur, Nong-hyllam bad Nongjri kiba hap hapoh ka South West Khasi Hills District.
Ka jingleit khynra laisen ka FKJGP ïa ki dukan bar jylla ka dei kum shibynta ban peitngor ïa ka jingïoh rung kyrthep ki bar jylla hadien ba ka Sorkar Assam ka la kyndang ïa ki briew bym dei trai ri trai muluk.
Ha kane ka jingkhynra, ka seng ka la lap ba don katto katne ki dukan bym don trading licence bad don ruh ki dukan kiba la khang khyrdep hi hadien ba la ïohi ïa ka jingkhynra ka seng bad don ruh ki dukan kiba ka seng ka la khang khyrdep hi.
UBah Kenesjune LNonglait haba ai jingkren sha ki lad pathai khubor u la kyntu ïa ki paidbah ka thaiñ ba kin peitngor ha kaba ïadei bad kane ka jingwan rung kyrthep ki briew ba nabar. U la ong ruh ba ka seng kan sa buh hi ïa ki khyrdop ban peitngor ïa ki briew kiba nabar, namar ka seng ka ïoh jingtip ba ki don ki briew kiba shong ha ki kali, hynrei ynda la poi ha kine ki jaka ki la sakma kylleng bad ym lah ban tip ki leit shaei bad u kyrmen ruh ba lyngba kine ki khyrdop kan ïarap ban tehlakam ïa ka jingwan rung ki briew hapoh ka jylla.
Katba u Bah Balse Kharbani u la ïathuh ba ka long kaba phylla ban lap ba ki dukan die dawai (drug store) kim don ïa ki trading licence bad ki licence pharmacy ruh kim don. “Ngi kum ka seng ngi kyntu ïa ki bor bahalor khamtam eh ïa ki bor ba dei peit ïa ki drug store ba kin wan peit ha kine ki jaka namar ka jingleh thurmur bad kim don wat tang ka licence pharmacy,” u la ong.
Shuh shuh u la kyntu ruh ïa ki Rangbah Shnong ban ai ka kti kamon kti kadiang ban pynbha ïa ka jaidbynriew namar khamtam eh ka Sorkar Assam ka la pynjur ïa ka jingkhynra bad katkum ka jingtip jong ka seng, kibabun ki wan noh beit sha ka Jylla Meghalaya bad u la kyntu ruh ïa ki Rangbah Shnong ba kin peitngor ïa ki briew kiba wan nabar bad tang ka EPIC kam pat biang namar bun ki bar jylla kiba wan na Assam ki lah don lypa ki EPIC, bad kwah ban pynshai hangne ba ka EPIC ki lah ban don namar ba ki la sah slem hapoh Assam, hynrei lada kim don ïa ka police verification napoh ka tnat pulit kynmaw ba kita kim dei shuh ki nongshong shnong ka Assam, hynrei kidei kiba la shah beh na Assam, ong u Bah Balse.
