Shillong Nailar 04
Ha kawei ka jingjia ba sngewsih haduh 5 ngut ki briew ba shong hapoh ka Maruti Alto ki la duh noh ïa ka jingim hadien ba ki la kum leit noh shapoh riat Lumloiñ, ka surok bah Shillong-Dawki. Kane ka riat ka long kaba la jylliew bad kaba dei ka surok ba dang pyntrei pynbha ïa ka.
Kane ka jingjia hap katei ka kali shapoh riat kadei kaba la jia hynnin ka miet jong ka 03 tarik u Nailar 2025 ha kapor kumba 8 baje eiei, katba ki dangthmu ban leit sha Shnong Lyngkyrdem bad baroh ki la khlad noh hashen.
Katei ka kali Alto kadei kaba don ïa u Registration Nombar ML 05 U 4926 kaba dang hiar na Shillong ban leit sha Lyngkyrdem.
Kitei ki 5 ngut kiba la hap shapoh riat ki kynthup ïa ka Kong Elida Marbaniang 65 snem karta, Mebanador Marbañiang 28 snem, Aimiki Marbañiang 23 snem kiba dei na Lyngkyrdem, katba i Kong Risbun Kurbah 22 snem bad u Damebanshngaiñ ba dang 1 snem shiteng kiba dei na shnong Mawpun Rum, Sohiong. Bad kine baroh ba shong hapoh katei ka Alto kidei shi iing shi sem.
Ki pulit ki la ïathuh ruh ba ka jingjrong jong katei ka riat kadon kumba 200 phut eiei.
Ki pulit Search & Rescue Team (SRT) naduh hynnin ka miet ki la poi sha katei ka jaka mar shu ïoh jingtip bad namar ka jingdum lyoh palat bad jur u slap kim shym la ïohi eiei bad khlem lapdien ïa ki, hynrei kadei hynne ka step ba ki pulit ki la lap bad ïohi ïa katei ka kali shapoh riat, ha kaba la ïohi ruh ba ka kali ka la pra lyngkhot lyngkhai.
Watla ki pulit ki la pyrshang ban leit hiar shapoh ban ïoh sei noh khamkloi ïa ki metïap jong kitei ki briew, hynrei ka la shimpor namar ka jingjur u slap bad syntuid ka khyndew nalor ka jingdum lyoh. Bad ha ka janmiet pat ki pulit ryngkat ka jingïarap lang ki samla jong ka shnong Lyngkyrdem ki la lah ban sei ïa baroh ki metïap jong ki 5 ngut, ba kynthup ïa i wei i khunlung.
Haba ïakren pat bad u Bah R. Marbañiang u ba dei u hynmen jong katei ka longkmie kaba la hap shapoh riat u la ïathuh, ba ka jinghap jong ki hapoh riat kadei ka jingbym ker ïa ka surok bad namar ka jingdum lyoh ki la kum ïaid lait ïa ka surok bad ka kali ka la noh sha riat.
“Ha ka jingshisha kiba pyntrei ïa ka surok ki la dei ban buh dak haba don kaei kaei ka dak ban lait na kano kano ka jingmynsaw, hynrei ha kane ka jaka ba la hap kine 5 ngut khlem don kano kano ka jingkah ne jingker” la ong u Bah Marbañiang.
Kumta u la bynrap da kaba ong, ba na ka liang ki BDO,SDO kiba peit ïa ka lynti ïaid lynti wan bad ka kompany ba pyntrei ïa kane ka surok kidei ban shimkhia lem, namar kum kane ka jingjia ka la pynsngewsih kthang ïa ngi kiba ha ïing ha sem ruh bad khnang ba kiwei kin nym jia shuh kum kane ka jingjia ki la dei ban shimkhia ban ker ïa ki jaka ki bym long ban ïaid kali.
Ka la mih ruh ka jingkynnoh na ki nongshong shnong bad ki bahaïing ha sem jong kitei ki lanot, ba kadaw ba ki sa hap hapoh katei ka riat dei namar ka jingtrei torti ka NHIDCL ka bym shym la ker ïa ka surok ka bym long ban ïaid kali.
Na ka liang jong u Rangbah Shnong ka Shong Mulieh pat u Bah Francis Khonglam u la pynpaw ba ka jing bym ker ïa ka surok ha riat Lumloiñ, ka surok bah Shillong-Dawki kadei ka jingleh torti ka tnad NHIDCL kaba la pynlong ba ki 5 ngut ki shi ïing shi sem ban hap na katei ka surok shapoh riat.
U la ïathuh ba u ju ïaid lynti man ka por na katei ka surok bad myn sngi saitjaiñ u ïohi ba kane ka surok kam don jingker kumta u la don ka jingmut ban ong, ban buh jingker noh ïa katei ka surok hynrei ka la jia noh shwa kane ka jingjia ba sngewsih.
“Ka ktah bha ïa ianga bad nga sngew synei ïa kito kiba la hap shapoh katei ka riat. Nga ju pynkynmaw man ka por ïa kane ka kompany ba kan buh ïa ki jingthoh ha kino kino ki jaka ba itieng ban ïaid” la ong u Bah Francis Khonglam.
Haba ïoh ban ïakren pat bad u Paduh jong i khunlung ba hap lang shapoh riat u la ïathuh ba kim donkam ban leh ïa ka post mortem namar ki la tip shai ïa ka jingkhlad jong ki bad ïa ka kmie ryngkat i ne i khunlung yn rah ha Mawpun Rum, Sohïong ban leh burom khatduh katba ïa ki 3 ngut pat ba kynthup ïa u kpa i ne i khun, ka kmie jong u ryngkat bad u para yn kit sha Lyngkyrdem ban pyndep ïa ka jinglehñiam ba khatduh.
