Nongstoiñ, Naitung 04
U Sub-Divisional Magistrate jong ka Mawshynrut Civil Sub-Division u la pynmih da ka hukum hapoh kyndon 163 jong ka BNSS, 2023, ban khang pyrshah ïa ka jingtih shyiap bad ka jingkhlong maw be-aiñ ha baroh ka thaiñ jong ka Sub-Division.
Ha ka kyrwoh khubor bala phah, u sub divisional magistrate u la ong ruh ba kane ka hukum ka mih hadien ba la ïoh jingtip ba ki don kiba tih shyiap bad khlong maw be-ain, kaba la ktah ïa ki wah, ki wahduid, ka um hapoh khyndew, ki khlaw, bad ka jingpynjulor ïa ka khyndew, jinghap lum, bad ka ktah ruh ïa ka jingim jong ki jingim kiba im ha ryngkew bad ha ki um ki wah.
Nangta, u la ong ruh ba na ka bynta ka jingshngaiñ ki paidbah bad ka jingkheiñ kor ïa ka mariang, u Bah C.P. Mawkon, MCS, Sub Divisional Magistrate, Mawshynrut Civil Sub Division, u la pynbna ban khang ïa baroh ki briew, ki kynhun, ki kur ban ïashim bynta ha kine ki kam pynkheiñ aiñ bad ki kam pynjot mariang, hynrei kane ka hukum kan ym treikam satia ïa kito kiba don ïa ki kot sla kiba biang kiba la ïoh jingbit na ki bor ba dei peit.
Shuh shuh u la ong ruh ba namar ka jingdonkam kyrkieh, la pynmih ïa kane ka hukum bad kan treikam noh mardor, hynrei kito kiba sngew ba kane ka hukum ka ktah ïa ki, ki lah ban kyrpad ban pynkylla ne pyndam na ki bor ba dei peit.
