Shillong, Nailar 04
U nongïalam ka National People’s Party (NPP) uba dei ruh u Myntri Sorkar, u Marcuise N. Marak u la ong ba lada ka Ri-lum Khasi-Jaiñtia kam ïaid shakhmat bad ka mat pynroi halor ka lynti rel, ka Ri-lum Garo ha kawei ka liang kan dawa beit ban pynïar ïa ki lynti rel hapoh ka thaiñ.
“Lada ka Ri-lum Khasi (bad Jaiñtia) kim ïaid shakhmat bad ka lynti rel, tikna, na ka liang jong ngi, ngin dawa (ïa ka ha Ri-lum Garo) namar ngi donkam ban pynïar ïa ka lynti rel na Mendipathar,” ong u Marak sha ki nongthoh khubor ha ka Lah Sngi U Blei.
Une u nongmihkhmat ka Williamnagar u la ong ba u nongmihkhmat ka Siju-Rongara, u Rakkam A. Sangma u la dep ban dawa pynïar ïa ka lynti rel sha Baghmara bad ki don ruh ki jingdawa sha West Garo Hills.
U la ban jur ba ka jingpynïar ïa ka lynti rel na Mendipathar kan ai jingmyntoi shi kat dei ïa ka thaiñ, khamtam eh ryngkat ka jingkieng ka ban sa wan halor ka Wah Brahmaputra ka ban pynïasoh ïa ka Phulbari sha Dhubri.
“Ngan kmen eh ban kyrpad ïa ka jingpynïar (ïa ka lynti rel sha East Garo Hills) hynrei ka jingmang kan long ban pynïasoh ïa ka sha South West Garo Hills namarba ki don shibun ki kam rep ha katei ka thaiñ bad lada pynïasoh ïa ka bad shisien ba la pynïasoh ïa ka jingkieng halor ka Brahmaputra na Phulbari sha Dhubri, kan long ka jaka kaba biang eh na bynta ki kam khaïi ha West Garo,” la ong u Marak.
Ka jingthmu ban pynïar ïa ka lynti rel kan pynbha ym tang ïa ka lad pynïasoh hynrei kan kyntiew ruh ïa ki kam khaïi ha West Garo Hills.
Haba la kylli la un aiti ne em ïa ka jingtyrwa sha ka Sorkar, u Marak pynban u la pynpaw ïa ka jingsngewhun ba ka jingpynïar ïa ka lynti rel sha Baghmara ka lah ban ïaid lyngba ka Williamnagar, ka ban ai jingmyntoi ïa ka thaiñ.
“Kata ka long kaba biang eh na bynta jong nga namar lada pynïar ïa ka lynti rel sha Baghmara, tikna ba kan ïaid lyngba ka Williamnagar,” u la bynrap.
