Saudi, Nailar:
Ka Saudi Arabia ha ka Sngi Saitjaiñ ka la sdien phasi ia ki 8 ngut ki runar ha kum kane ka por ba ka jingphasi briew lane ka jingpyndonkam ia ka ‘Death Penalty’ ha katei ka ri, ka la jur haduh katta, khamtam halor ki jingshah rai pynrem, kiba iadei bad kito kiba don kti ha ki kam droks.
Ka tnat Saudi Press Agency (SPA) ka la iathuh ba saw ngut ki nong Somalia bad lai ngut ki nong Ethiopia ki la shah phai ha ka Sngi Saitjain ha ka thaiñ Shatei jong ka Najran namar ka jingshalan droks tuh shapoh katei ka ri.
Uwei napdeng jong kitei kiba shah phasi pat, u dei u runar jong ka Saudi hi, uba la shah rai pyniap namar ka jingpyniap jong u, ia la ka jong ka kmie.
Naduh ba sdang jong u snem 2025, ka Saudi Arabia ka la phasi haduh 230 ngut ki koidi jongka, katkum ka kaiphod ba la ioh buh jingkhein da ka AFP.
Bun na kitei kiba sah rai pyniap, 154 ngut ki dei kiba shah pynngat kyndon bad shah pynshong patok namar ki daw ba iadei bad u drok.
Ka jingjur palat jong ka rai phasi, ka buh ia ka ri ha ka lynti ban tam ia ka rekod jong u snem ba la dep kaba long 338 tylli ki rai phasi.
Ki nongpeit bniah ki pyniadei ia katei ka jingkiew bad ka “thma pyrshah ia u drok” kaba la sdang ha u snem 2023, ha kaba bun na kito kiba la shah kem nyngkong tang mynta la pyniap ia ki hadien ka jingtohkit bad jingshah rai pynrem jong ki.
Ki nongïakhih ki ong ba ka jingbteng jong katei ka ri ban pyntreikam ïa ka jingpynshitom ïap ka pynsniew ïa ka dur jong ka imlang- sahlang kaba long ka phang pdeng jong ka jingthmu pynkylla jong u Syiem Mohammed bin Salman ha ka Vision 2030.
Ki bor synshar jong ka Saudi ki ong ba ka jingpynshitom iap ka long kaba donkam ban pynneh ia ka shongsuk- shongsaiñ bad la pyndonkam ia ka tang hadien ba la dep pynkut lut ia ki lad jingbishar baroh.
