Guwahati, Nailar:
Ka jingkulmar ka la nang jur ha Manipur hadien ba ar tylli ki seng riewlum ki la pynpaw ïa ka jingsngewkhia halor ka jingshah kem ba dang shen ïa arngut ki briew na ka jaitbynriew Hmar, kiba la shah kem ha ka jingïadei bad ka jingshah pynïap jong ki 6 ngut ki jaitbynriew Meitei ha u snem ba la lah ha Jiribam.
Ki seng ki la kynnoh ba ki briew kiba la shah kem kim don kano kano ka jingthoh bria ha ki kam runar bad ba ka jingshah set jong ki ka long kaba khlem nongrim.
Ka National Investigation Agency (NIA) bad ki Pulit ka Assam ki la kem ïa u Thanglienlal Hmar bad u Lalrosang Hmar baroh arngut ki dei ki nongshong shnong jong ka Cachar distrik jong ka Assam. Kane ka jingkem ka la long ha ka sngi Palei, ha kaba la kem ïa u Thanglienlal Hmar ha Assam bad ïa u Lalrosang Hmar la kem ha Aizawl ka nongbah jong ka Mizoram.
Ka NIA ka la kynnoh ba kitei ki arngut ki dei ki “nongïasylla” ha katei ka kam runar, ha kaba ki la ïoh kurup ar tylli ki mobile phone bad ar tylli ki SIM Card na ki kum shi bynta jong ka jingtohkit jong ki.
Ki lanot kiba la shah pynïap ki long ka Yumrembam Rani Devi, ka Telem Thoibi Devi bad ka khun jong ka ka Telem Thajamanbi Devi, bad ka Laishram Heithoibi Devi bad ki arngut ki khun ba dang rit jong ka.
