New York, Nailar:
U President jong ka America, U Donald Trump, ha ka Sngi U Blei, u la shim biang ia ka burom, da kaba kam trai ba dei ma u, uba wanrah ia ka jingiasuk hapdeng ka India bad ka Pakistan ha ka thma ka dang dep jia shen ha une u snem.
Naduh ka 10tarik u Jymmang, haba u Trump u la pynbna ha ki rynsan Social Media ba ka India bad ka Pakistan ki la mynjur ban sangeh thma “pura bad mardor” hadien ka jingïakren “ba jrong” ba la pynïasuk da ka Washington, u la pynkynmaw biang ïa ka jing-ong jong u ha ki katto- katne ki khep.
Kane ka jingkam ba khatduh jong u Trump ka long hadien katto- katne sngi ba ka Press Secretary jong ka White House, ka Karoline Leavitt ka la ong ba dei ban ai khusnam Nobel Peace Prize ïa u Trump namar ba u la lah ban pynkut noh ïa ki bun tylli ki jingïakynad ha kylleng ka pyrthei kynthup ïa ka jingïakynad hapdeng ka India bad ka Pakistan.
Ha ka Sngi U Blei, ha ka jingthoh ha ka Truth Social, U Trump, ula ther tyngeh ïa u nongpynïaid radio bad nongthoh kot Charlamagne Tha God, bad u la ong ba um tip ei ei shaphang jong u lane ïa kaei kaba u la leh, “kum ban shu pynkut noh ïa ki 5 tylli ki thma, kynthup ïa ka jingïap snam kaba 31 snem hapdeng ka Republic of Congo bad Rwanda, ha kaba hynriew million ngut ki briew ki la ïap, bad kam shym la don satia ka jingkut.” “Um shym la tip ia kata, lane ka India bad ka Pakistan lane, ban pynduh jait ia ki bor nuclear jong ka Iran, lane ban khang ia u Border ba plie uba shyrkhei, lane ban thaw ia ka ioh ka kot kaba khraw tam”, la ong u Trump.
Dang ha ka sngi ba la leit, U Trump ha ka jingiakren ha Newsmax, u la ong ba u la pyniasuk ia shibun tylli ki thma kiba la wan jia ha kane ka pyrthei ba mynta.
U Trump ha ka Sngi Balang jong kane ka taïew ba la lah, u la pynbna ban buh ia ka khajna kaba 25% ia baroh ki mar kiba wan na India naduh ka 1 tarik u Nailar, ryngkat bad ka jingpynshitom kaba khlem da batai bniah ia kiba thied ia ka umphniang bad ki tiar ïakhun jong ka Russia.
Katba, ka khajna naka bynta ka Pakistan ka long tang 19% bad ka la duna ia ka 29% kaba la pynbna da u Trump ha u Lber. Ha ka jingshisha, U Trump ha kane ka taïew ba la dep, u la pynbna ruh ban wanrah ïa ka jingïateh kular khaïi pateng bad ka Pakistan bad ong ruh ba ka United Staes kan ïatreilang bad ka Pakistan ban pynroi ïa kaei kaba u la batai kum ka “nong pynmih ba heh tam” jong ka ri South Asia.
Naduh ka 10 tarik u Jymmang, u Trump u la kren biang ïa ka jing-kam jong u la haduh kumba 30 sien ba dei ma u, uba la iarap ban pyniasuk ia ka ka jingïakynad hapdeng ka India bad ka Pakistan bad ba u la ong ïa ki para marjan jong ka South Asia kiba don ïa ki tiar nuclear ba ka America kan leh “shibun ka khaïi pateng” bad kine ki ri lada ki sangeh noh shi syndon ïa ka jingïakynad.
Hynrei na ka liang u Myntri Rangbahduh ka India, u Narendra Modi u la ong ha ka ïing dorbar Parliament mynta ka taiew ba ym don uwei ruh u nongialam jong kano- kano ka ri u la ong ia ka India ban pynsangeh noh ia ka Operation Sindoor kaba la sdang da ka India kum ka kput pyrshah ia ka jingwan thombor jong ki lehnoh Pakistan ha ka 22 tarik u Lber pyrshah ia ka India ha ka thaiñ Pahalgam jong ka Jammu & Kashmir kaba la shim ia ka jingim jong ki 26 ngut ki nong India ha katei ka jingjia.
