Shillong Nailar 04
Ki Seng Samla Shnong Lyngkyrdem da ka mynsiem ka jingsngewkhia ki la wan ban ïarap ïa ki pulit ka Search & Rescue Team (SRT) ban sei ïa ki metïap jong ki 5 ngut ki briew kiba la hap shapoh riat Lumloiñ.
Haba ïakren bad u wei u samla u ba la ïarap lang ban hiar shapoh riat u la ïathuh ba ki la sdang ban hiar shapoh riat naduh dangstep bad ka jingjur palat u slap bad syntuid ka khyndew ka la kham shimpor ban sei ïa ki metïap.
U la ong, ba ka shem jingeh shibun ban noh shapoh katei ka riat namar ka long ka riat kaba jrong bad ka jingsyntuid ka khyndew namar ba jur u slap, hynrei ym banse namar ba ka jingjia ba sngewsih.
U la ïathuh ruh ba ka jingjrong jong katei ka riat Lumloiñ ba hap kitei ki 5 ngut ka dei kumba 200 phut eiei.
Ki pulit ka Search & Rescue Team (SRT) ki la pyrshang ban ïa tan ïa ki metïap sha surok bad ka riat ruh kalong kaba jrong kim shem la lah ban tan na jaka ba ki hap bad ki la khot lang ïa ngi ki samla jong ka Shnong Lyngkyrdem ban ïarap tan lang bad hadien kata la lah ban tan lut ïa baroh ki metïap, la ong u tei u samla.
Haba kylli pat u tei u samla la ong “Na ka liang jong ngi ki nongshong shnong kiba la tip bha halor ka jinglong jingman ka suiñbneng sha kine ki thaiñ, da kaba kyntu ïa ki briew ba wan shane, ba kin da husiar bha haba ñiah kali namar mynta ka dangïaid ka jingpyntrei ïa ka surok bad ka jingjur u slap bad dum lyoh, khnang ban lait na kano kano ka jingmynsaw”.
