Shillong, Nailar 04
U nongïalam ka National People’s Party (NPP) uba dei ruh u Myntri Sorkar, u Marcuise N. Marak u la pynpaw ïa ka jingsngewskhem ba ka seng ka la nang ïoh ïa ka jingkyrshan na ki paidbah hashuwa ka ilekshon ban wan sha ka Garo Hills Autonomous District Council (GHADC), ka ban long ha u snem ban wan, namar ka jingtreikam bad ka roi ka par kaba dang ïaid mynta ha Ri-lum Garo.
Haba kren halor ka jingpynkhreh jong ka seng, u Marak u la pynpaw ba ka NPP ka la kiew bha ha Ri-lum Garo hapoh ka jingïalam jong u Conrad K. Sangma.
“Hapoh ka jingïalam jong u Conrad K. Sangma la leh shibun kiei-kiei ha Ri-lum Garo lait na kiwei pat ki bynta jong ka Jylla. Kumta ki paidbah ki dei na ka bynta ka NPP naba ki la ïohi ïa ki jait kam kiba jia ha Ri-lum Garo. Kumta ki paidbah ki dei na ka bynta ka NPP,” u la ong ha ki nongthoh khubor ha ka Lah Sngi U Blei.
Haba ban jur halor ka jingdonkam jong ka rukom jied ïa ki kyrtong, une u nongïalam ka NPP u la ong ba ka seng kan da jied bha ïa ki kyrtong na ka bynta ka ilekshon MDC, da kaba pyntikna ba kin long kiba lah ban shaniah bad kiba lah ban mihkhmat ïa ki nongrim jong ka seng.
U la kular ruh ba ka seng kan trei shitom ban pynngeit ïa ki paidbah ba ka NPP ka dei ka seng kaba biang tam ba kin jied na bynta ka GHADC.
“Ki bun bah ki mat kiba mih ha District Council hynrei ha ka jingïalang jong ka seng, nga la dep ban ïakren ïa kata ka mat. Lada ngi donkam ban pynkhlaiñ ïa ka District Council ha Ri-lum Garo, ngi hap ban trei shitom bha bad ngi hap ban leit sha ki paidbah ban pynngeit ïa ki ba kane ka dei ka seng kaba phi lah ban buh ïa ka jingshaniah jong phi. Ngin sa pyrshang katba lah ban pynkhlaiñ ïa ka GHADC,” la ong u Marak.
Haba kylli la ka jingeh kaba dang ïaid ha GHADC kan ktah ne em ïa ka seng ha kane ka ilekshon, u State Working President ka NPP u la kam ba ka seng kan ïakynduh ïa ki jingeh ha ka ilekshon, khamtam haba ïadei bad ki jingeh kiba la wanrah da ki Executive Committee kiba mynshuwa.
Hynrei u la pynpaw ka jingsngewskhem ba ka seng kan sa lah ban pynbeit ïa kine ki jingeh bad ban trei ha ka ban pynkhlaiñ ïa ka GHADC.
“Namarkata, ki briew ki sngewthuh ïa ka mat bad ngin sa ïakren bad ki paidbah haba ïadei bad kane ka bynta,” la bynrap u Marak.
U Marak u la pyntip ba seng shen kan sa thaw ïa ka Election Committee, ka ban khmih ha ka ban jied ïa ki kyrtong ban ïakhun ïa ka ilekshon MDC.
U la ong ba ka seng ka la sdang ban pynkhreh ïa ka ilekshon, ha kaba la pynlong ruh ïa ki jingïalang jong ki Regional Committee bad ki jingïalang ha ka kyrdan jong ki distrik ban pynithuh ïa ki kyrtong kiba i-don jingkyrmen ban ïakhun.
Ka NPP ka la thaw ïa ka Regional Committee ba kynthup ïa ki President jong ki distrik, ki Secretary, lem bad ki President bad Secretary jong ki tnad treikam (Frontal Wing) ba hakhmat jong ka seng.
Kane ka komiti kan don ïa ka bynta kaba kongsan ban pynïaid ïa ka buit treikam ilekshon jong ka seng bad ka rukom jied kyrtong.
U Working President u la pyntip ruh ba ka seng ka la sdang ban pynithuh ïa ki kyrtong kiba lah ban mihkhmat bad pynbna ruh ba uwei kum kine ki kyrtong – u Sengbath R. Marak u la ïoh ka jingkyrshan da kawei ka sur napoh Williamnagar konstitwensi.
“Nga la don ka jingïalang na bynta ka konstitwesi lajong jong ka Williamnagar ha kaba da kawei ka sur ngi la kyrshan ïa ka jingpynrung kyrteng ba la buh da u President ka Block, u R. Sangma, uba la tyrwa ïa ka kyrteng jong u Sengbath R. Marak. Baroh ki la pdiang ïa kata bad ngin sa phah ïa ka kyrteng jong u sha ki bor ba halor jong ka seng ban ai tiket ïa u ban ïakhun na Williamnagar konstitwensi,” u la ong da kaba pynpaw ba kane ka lynti ka long ban sdang ai mynsiem ïa kiwei pat ki konstitwensi ban shim ïa ki sienjam ka jingmanbha khnang ban ïoh rai noh kloi haba ïadei bad ki kyrtong jong ka seng.
