Shillong, Nailar 04
Ka Nongumlong ka la jam sha ka quarter final na ka Group-A ha ka Third Division Football League 2025 ba la pynïaid da ka Shillong Sports Association, hadien ba ka la lah ban pynliem noh ïa ka Madanrting da 6-2 kol ha ka lah sngi U Blei ha SSA Stadium kaba ha First Ground, Polo.
Ha kawei pat ka jingïalehkai, ka Umrynjah ka la pynliem ïa ka Umlyngka da 1-0 kol lyngba u Banshemphang Nongkhlaw (39) na ka bynta ban bat ïa ka kyrdan ba hakhlieh jong ka Group-B bad kamai 12 point na ki saw sien ïakhun. Kine baroh arliang mamla ki la ïoh rung lypa sha ka quarter final, hynrei kane ka jingïakhun ka long kum ka jingrai ban ïaknieh ïa ka kyrdan ba hakhlieh na katei ka group.
Haba phai sha katei ka jingïakhun kaba la long kham hashwa, ka Nongumlong ka donkam ban khur ïa ka jingjop khnang ban jam sha kawei pat ka kyrdan. Ïa kine ki kol la thep da u Marques Myrthong (8), Nehlang Kharsohnoh (17), Donbor Nongneng (60), Kynpham Kharsohnoh (75), Barry Nongneng (76) bad u Lasborn Nongbri (90’+4). Katba na ka Madanrting la pynphai da u Ryan D Shylla (81) bad u Robert Vaiphei (82).
Lyngba kane ka jingjop ka Nongumlong ka la jam na ka kyrdan balai sha kaba nyngkong da kaba kamai 7 point na ki saw sien ïakhun.
Ka Nongumlong ka la shah khate point ha ka jingïakhun pyrshah ïa ka Sanmer namar ba la bishar bad pynshong nongrim ïa ka jingujor ba la mudui da ka Sanmer hadien ka jingïalehkai. Kumta ka Sanmer ka la ïoh 3-0 kol.
Hynrei lyngba ka jinglah ban kamai 6 point hadien kane ka jingïakhun, ka Nongumlong ka la biang pura ban ïoh rung sha ka quarter final hadien ba la tam ïa ka Pomlakrai, Sanmer bad ka Lawmali Pyllun, kiba la kamai mar 5 point na ki saw sien ïakhun.
Hynrei kumba ka long mynta ka Sanmer ka dangsah sa kawei ka jingïakhun pyrshah ïa ka Madanrting hadien ba la pynkynriah ha ka 26 tarik u Naitung. Te kumta ka Sanmer ka donkam tang ban shu pynïakhaid bad ka Madanrting khnang ban oynthikna ban ïoh rung sha ka quarter-final.
Ha kajuh ka por ka Madanrting ka donkam ban khur ïa ka jingjop khnang ban lait na ka jingshah pynhiar kyrdan lada ka dangïai sah ha ka kyrdan ba shatrai na katei ka group.
